प्रधानमन्त्रीको राजीनामाको माग गरेर संसद् अवरुद्ध गर्नु संसदीय मान्यताको विपरीतः गृहमन्त्री श्रेष्ठ

खबरब्रेकिंग, काठमाडौं,असार २१ गते । उपप्रधान एवं गृहमन्त्री नारायणकाजी श्रेष्ठले बहुमतबाट निर्वाचित प्रधानमन्त्रीको राजीनामाको माग गरेर संसद् अवरुद्ध गर्नु संसदीय मान्यताको विपरीत भएको बताएका छन् ।
प्रेस सेन्टर नेपाल भरतपुरले बिहीबार चितवनमा आयोजना गरेको पत्रकार सम्मेलनमा बोल्दै उपप्रधानमन्त्री श्रेष्ठले यस्तो बताएका हुन । फरक प्रसङ्गमा उनले मिटरब्याजीविरुद्धको अध्यादेश निष्क्रिय भए पनि पीडितलाई न्याय दिने काम नरोकिने बताए ।
सरकारले गठन गरेको आयोग र जिल्लामा रहेको सहजीकरण समितिले आफ्नो कामलाई अघि वढाउने उनको भनाइ थियो । अध्यादेश निष्क्रिय हुने र विधेयक पारित नहुने स्थिति आउन नहुने उल्लेख गर्दै उनले पीडितलाई जुनसुकै अवस्थामा समेत न्याय दिइने जिकिर गरे । उनले भ्रष्टाचार नियन्त्रणका लागि सरकारले काम अघि बढाइरहेको तथा प्रहरीले अपराध अनुसन्धान र भ्रष्टाचार नियन्त्रमा स्वतन्त्र ढङ्गले काम गरिरहेको दाबी गरे ।