भाषण गर्दै गर्दा अचानक सदाका लागी ढले गौतम

 

१३ कात्तिक, बुटवल । रुपन्देहीमा उद्योगहरूमा भइरहेको विद्युत् कटौतीविरुद्धको आन्दोलनले आज दुःखद मोड लिएको छ। नेकपा (एमाले) निकट नेपाल ट्रेड युनियन महासंघ (जिफन्ट) नेपालका उपाध्यक्ष कमल गौतमको बिहीबार दिउँसो आन्दोलनको बीचमै निधन भएको छ।

नेपाल विद्युत् प्राधिकरणले रुपन्देहीका १३ वटा उद्योगको बिजुली लाइन काटेपछि आक्रोशित उद्योगी, व्यवसायी र श्रमिकहरूले विरोध प्रदर्शन गरिरहेका थिए। सोही आन्दोलनको सभामा जिफन्टका उपाध्यक्ष गौतमले ‘श्रमिकको आवाज दबाउने उद्योगविरोधी नीति सह्य हुँदैन’ भन्दै भाषण गर्दै गर्दा अचानक ढलेका थिए।

साक्षीहरूले बताएका छन्, गौतमले भाषणको अन्त्यमा “अब यो लडाइँ श्रमिकहरूको अस्तित्वको हो” भनेपछि केही क्षणमै उनलाई बेहोस भएको देखियो। उनलाई तत्काल मणिग्रामस्थित क्रिमसन अस्पताल पुर्‍याइए पनि चिकित्सकहरूले उनलाई मृत घोषित गरे।

एमाले रुपन्देहीका अध्यक्ष यज्ञ गैरेले गौतमको निधनप्रति गहिरो शोक व्यक्त गर्दै भने, “उहाँ श्रमिक आन्दोलनको आत्मा हुनुहुन्थ्यो। उहाँको निधनले हाम्रो आन्दोलनलाई भावनात्मक रूपमा ठूलो चोट पुर्‍याएको छ।” उनले थपे, “विद्युत् कटौतीका नाममा उद्योग बन्द गरेर सरकारले रोजगारको स्रोत नै सुकाउने काम गरेको छ, त्यसविरुद्धको आवाज गौतमजस्ता नेताले कहिल्यै रोक्न दिनुहुन्नथ्यो।”

गौतम बुटवल उपमहानगरपालिका–३, लक्ष्मीनगरका स्थायी बासिन्दा थिए। लामो समयदेखि उनी श्रमिक अधिकार, तलब संरचना, र औद्योगिक नीतिमा सुधारका पक्षधर अभियन्ताका रूपमा सक्रिय रहँदै आएका थिए। जिफन्ट रुपन्देही शाखामा उनले करिब दुई दशकदेखि नेतृत्व जिम्मेवारी सम्हालेका थिए।

उद्योगहरूमा भएको विद्युत् कटौतीको विरोध स्वरूप आज बिहानदेखि नै बुटवल–मणिग्राम क्षेत्र उद्योगीहरूले उत्पादन ठप्प पारेका थिए। सोही क्रममा आयोजित सभामा उपस्थित सयौं श्रमिक र उद्योगीहरू अहिले क्रिमसन अस्पताल परिसरमा भेला भएका छन्। अस्पताल बाहिर शोकाकुल भीड रोइरहेको छ, जसले उद्योग क्षेत्रको असन्तुष्टि र पीडा दुवै प्रकट गरेको छ।

जिफन्टका केन्द्रीय सदस्यद्वारा जारी वक्तव्यमा भनिएको छ, “उपाध्यक्ष गौतमको आकस्मिक निधन केवल व्यक्तिगत क्षति होइन, यो श्रमिक आन्दोलनका लागि ठूलो क्षति हो। उहाँको अपूर्ण भाषण आज हजारौं श्रमिकको अन्तरमा अधुरो नारा बनेर गुञ्जिरहेको छ।”

यसबीच, उद्योगी संघ, व्यवसायी महासंघ र विभिन्न श्रमिक संगठनहरूले गौतमको निधनमा शुक्रबार देशव्यापी विरोध कार्यक्रम गर्ने घोषणा गरेका छन्। उनीहरूले सरकारसँग विद्युत् आपूर्तिमा देखिएको ‘अव्यवहारिक कटौती नीति’ तत्काल खारेज गर्न र औद्योगिक क्षेत्रका मागहरूमा वार्ताको वातावरण बनाउन माग गरेका छन्।

हाल गौतमको शव पोस्टमार्टमका लागि क्रिमसन अस्पतालमै राखिएको छ। पार्टीका नेता, श्रमिक र स्थानीय सर्वसाधारण श्रद्धाञ्जली दिन अस्पतालमा निरन्तर आइपुगिरहेका छन्।