देशभर मनसुनी प्रभाव तीव्र, डुबान–पहिरोको उच्च जोखिम : महाशाखाको सतर्कता रहन आग्रह

 

२८ असार, काठमाडौं ।  देशभर मनसुनी वायुको सक्रिय प्रभाव कायमै रहँदा जल तथा मौसम पूर्वानुमान महाशाखाले बाढी, पहिरो र डुबानको जोखिम उच्च रहेको भन्दै आवश्यक सतर्कता अपनाउन आग्रह गरेको छ। मनसुनको न्यून चापीय रेखा पूर्वतर्फ औसत स्थानको वरिपरि र पश्चिमतर्फ औसत स्थानभन्दा अलि उत्तरतिर सक्रिय रहेको महाशाखाले जनाएको छ।

शुक्रबार बिहानसम्म देशका पहाडी भू–भागमा सामान्यदेखि पूर्ण बदली रही कतिपय स्थानमा मेघगर्जन र चट्याङसहित हल्का वर्षा भएको छ। हाल पनि देशका केही पहाडी स्थानमा वर्षा जारी रहेको छ। महाशाखाका अनुसार शनिबार देशभर सामान्यदेखि पूर्ण बदली रहनेछ भने बागमती, गण्डकी, लुम्बिनी, कर्णाली र सुदूरपश्चिम प्रदेशका विभिन्न स्थानमा हल्कादेखि मध्यम वर्षा हुने सम्भावना छ।

त्यसैगरी, यी प्रदेशका एक–दुई स्थानमा भारी वर्षा हुने पूर्वानुमान गरिएको छ। भारी वर्षाका कारण भू–क्षय, बाढी, पहिरो तथा गेग्रान बहावको जोखिम उच्च रहेकोले सतर्कता अपनाउन महाशाखाले विशेष अनुरोध गरेको छ। विशेषगरी सहरी क्षेत्र तथा तराई भू–भागमा डुबानको सम्भावना रहेकाले जनजीवन प्रभावित हुनसक्ने देखिएको छ।

महाशाखाले ठूला तथा साना नदी, नाला र खोलामा पानीको बहाव आकस्मिक रूपमा बढ्न सक्ने हुँदा तटीय क्षेत्रका बासिन्दा र स्थानीय प्रशासनलाई उच्च सतर्कता अपनाउन आग्रह गरेको छ। हिमाली र उच्च पहाडी भू–भागमा पनि हल्कादेखि मध्यम वर्षा र हिमपातको सम्भावना रहेकाले ती क्षेत्रका यात्रु र बासिन्दालाई आवश्यक सावधानी अपनाउन सुझाव दिइएको छ।

साथै, वर्षाका कारण यातायात, कृषि, स्वास्थ्य र पर्यटन लगायतका क्षेत्र प्रभावित हुन सक्ने भएकाले सम्बन्धित निकायहरूलाई समयमै पूर्वतयारी गर्न समेत महाशाखाले अनुरोध गरेको छ। मौसमको निरन्तर निगरानी गर्दै अद्यावधिक जानकारी लिन तथा जोखिम क्षेत्रमा यात्रा नगर्न पनि सर्वसाधारणलाई सुझाव दिइएको छ।