गाउँ–ठाउँ र देश राम्रो बनाउन परिवर्तन आफैँदेखि सुरु गरौँः नेता टेकबहादुर पुन मगर

 

४ मंसिर, काठमाडौँ । राष्ट्रिय स्वतन्त्र पार्टी (रास्वपा) का नेता टेकबहादुर पुन मगरले स्थानीय समुदायदेखि लिएर राष्ट्रिय स्तरसम्मको सुधारका लागि नागरिक स्वयं सक्रिय भएर अघि बढ्नुपर्ने धारणा सार्वजनिक गरेका छन्। सामाजिक सञ्जालमार्फत आफ्ना विचार सार्वजनिक गर्दै उनले जनतालाई परिवर्तन कसैले आएर गरिदिने होइन, आफूले नै सुरु गर्नुपर्छ भन्ने सन्देश दिए।

पुन मगरका अनुसार आफ्नो गाउँ, बस्ती, वातावरण, समाज र समग्र राष्ट्र राम्रो होस् भन्ने चाहना सबैसँग हुन्छ, तर त्यो चाहना केवल गुनासो गरेर पूरा हुँदैन। “तपाईं तपाइँको गाउँ, ठाउँ, देश, दुनिया राम्रो भएको हेर्न चाहनुहुन्छ भने त्यो काम तपाईंबाटै सुरु गर्नुहोस्, देश आफैँ बन्छ,” उनले लेखेका छन्। उनका अनुसार व्यक्तिगत जागरण, सामाजिक उत्तरदायित्व र अनुशासन नै दिगो राजनीतिक तथा सामाजिक सुधारको वास्तविक आधार हो।

नेता पुन मगरले आज देशले सामना गर्दै आएका अव्यवस्था, असन्तुष्टि र राजनीतिक भ्रमको जड पनि नागरिक तहबाटै सुरु हुने ‘बेफिक्री संस्कार’ भएको उल्लेख गर्दै अब प्रत्येक नागरिकले आफ्नो भूमिका पहिचान गर्नुपर्ने समय आएको बताए। उनका भनाइअनुसार स्थानीय सरसफाइदेखि जनसेवामा इमानदारी, कर तिर्ने संस्कार, अनुशासित नागरिक व्यवहार र युवा पुस्ताको सक्रिय सहभागिताले मात्र नयाँ राष्ट्र निर्माण सम्भव हुन्छ।

उनले दलहरूलाई मात्र दोष दिएर समस्याको समाधान नहुने पनि दोहोर्‍याउँदै भने, “नेता बदलिँदैमा देश बदलिँदैन, सोच बदलिँदा देश बदलिन्छ।” नागरिक चेतनामा आउने परिवर्तनले नेतृत्वलाई पनि उत्तरदायित्वशील र जनमुखी बन्न बाध्य पार्ने उनको तर्क छ।

यसअघि समेत पुन मगरले सुशासन, पारदर्शिता र नागरिक सहभागितामै आधारित ‘नयाँ राजनीतिक संस्कार’ को पक्षमा आफूले विभिन्न कार्यक्रम र अभिव्यक्ति मार्फत आवाज उठाउँदै आएका छन्। अहिलेको सार्वजनिक सन्देशमा उनले व्यक्तिगत स्तरबाट सुरु हुने सानासाना सकारात्मक गतिविधिहरूले नै देशलाई सही दिशामा अघि लैजान सक्षम हुने विश्वास व्यक्त गरेका छन्।