नेपाली नागरिक समाज सार्वजनिक, खड्का संयोजक चयन

 

२९ कार्तिक,काठमाडौं । देशभर सामाजिक न्याय, सुशासन र नागरिक अधिकारका मुद्दामा संगठित रूपमै आवाज उठाउने उद्देश्यसहित ‘नेपाली नागरिक समाज’ नामक नयाँ अभियान औपचारिक रूपमा सार्वजनिक भएको छ। काठमाडौँमा बसेको विशेष नागरिक भेलाले विभिन्न क्षेत्रमा सक्रिय अभियन्ता कृष्ण बहादुर खड्कालाई सर्वसम्मत रूपमा संयोजक चयन गर्दै अभियानको सूक्ष्म रूपरेखा प्रस्तुत गरेको हो।

शनिबार अभियानको घोषणा गर्दै संयोजक खड्काले नेपाली नागरिक समाज कुनै पनि राजनीतिक दलको प्रभाव वा दबाब बाहिर रहेर, नागरिकको सरोकारका विषयलाई स्पष्ट, बलियो र निरन्तर रूपमा उठाउने संस्थाका रूपमा अघि बढ्ने बताए। उनका अनुसार अब सरकारका विभिन्न निकायमा हुने गतिविधि र निर्णय प्रक्रियालाई पारदर्शी बनाउनेतर्फ नियमित निगरानी र दबाब अभिव्यक्त गरिँदै जानेछ।

यस्तै, सामाजिक न्याय तथा समावेशितालाई मुख्य केन्द्रबिन्दुमा राख्दै समाजले सीमान्तकृत समुदायका हकहित संरक्षणमा सक्रिय वकालत गर्ने प्रतिबद्धता खड्काले व्यक्त गरे। युवालाई नेतृत्वमा उभ्याउँदै राष्ट्रिय विकास प्रक्रियामा सहभागी बनाउने उद्देश्यले विभिन्न सशक्तीकरण कार्यक्रम सञ्चालन गरिने उनले बताए। नागरिक शिक्षा, संविधानमा निहित हक र कर्तव्यबारे सचेतना अभिवृद्धि गर्ने योजनालाई पनि प्राथमिकतामा राखिएको छ।

घोषणा कार्यक्रममा उपस्थित अन्य नागरिक अगुवाहरूले नयाँ अभियानले देशमा नागरिक चेतनाको स्तर उकास्ने र शासन व्यवस्थामा देखिएका कमजोर पक्षमाथि ठोस आवाज उठाउने अपेक्षा व्यक्त गरे। उनीहरूले खड्काको नेतृत्वमा भ्रष्टाचार, दुरुपयोग र सार्वजनिक निकायका कमजोरीविरुद्ध प्रभावकारी पहरदारी हुने विश्वास प्रकट गरेका थिए।

समाजले निकट भविष्यमा सातै प्रदेशमा संगठन विस्तार गर्ने, स्थानीयस्तरसम्म नागरिक संवाद तथा जागरण अभियान संचालन गर्ने योजना सार्वजनिक गरेको छ। यस कदमले नेपालमा बढ्दो नागरिक सक्रियतामा नयाँ ऊर्जा थप्ने र जिम्मेवार शासन अभ्यासलाई सुदृढ बनाउने अपेक्षा गरिएको छ।