आज कसैकसैले भनिरहेको हस्तान्तरण र पुस्तान्तरणको कुरा प्रति मेरो सहमति छैनः नेतृ उषाकला राई

 

२९ असोज, काठमाडौं । नेकपा एमालेकी नेतृ उषाकला राईले सामाजिक सञ्जालमार्फत हालका दिनमा भइरहेका ‘हस्तान्तरण’ र ‘पुस्तान्तरण’ सम्बन्धी बहसप्रति असहमति जनाउँदै आफनो स्पष्ट धारणा सार्वजनिक गरेकी छन् ।

उनले आज आफ्नो फेसबुक पेजमा लेख्दै भनेकी छन् — “आज कसैकसैले भनिरहेको हस्तान्तरण र पुस्तान्तरणको कुरा प्रति मेरो सहमति छैन । मेरो प्रष्ट धारणा रूपान्तरणको विषय हो । पार्टीभित्र हामी आफैले निर्णय गर्ने हो । बाहिरी बकवास कुनै आवश्यक छैन ।”

उनको यो अभिव्यक्तिलाई एमालेभित्र हालसालै चलिरहेको नयाँ पुस्ताको नेतृत्व हस्तान्तरण सम्बन्धी बहससँग जोडेर हेरिएको छ । पार्टीभित्र केही नेताहरूले पुराना पुस्ताबाट नयाँ पुस्तामा नेतृत्व जिम्मेवारी सुम्पिनुपर्ने आवाज उठाइरहेका बेला नेतृको यस्तो टिप्पणी आएको हो ।

उनले रूपान्तरणलाई नै प्राथमिक विषय बनाउँदै संगठनभित्र निर्णय गर्ने अधिकार स्वयं पार्टी र कार्यकर्तामै सीमित रहनुपर्ने स्पष्ट सन्देश दिएकी छन् । बाह्य टिप्पणी वा दबाबका आधारमा पार्टी सञ्चालन गर्न खोज्ने प्रयास सफल नहुने उनको तर्क छ ।

राजनीतिक विश्लेषकहरूले नेतृको अभिव्यक्तिलाई पार्टीभित्र आन्तरिक एकता, अनुशासन र स्वतन्त्र निर्णय प्रक्रियाको पक्षमा आएको सन्देशका रूपमा व्याख्या गरेका छन् । एमालेभित्र विचार, दृष्टिकोण र कार्यशैलीमा रूपान्तरण गरेर मात्र संगठनलाई बलियो बनाउने सोच उनको वक्तव्यमा झल्किएको छ ।

फेसबुक पोस्ट सार्वजनिक भएपछि पार्टीका कार्यकर्तामाझ यस विषयमा विभिन्न प्रतिक्रिया आएका छन् । कतिपयले नेतृको धारणा स्वागत गर्दै रूपान्तरणकै माध्यमबाट संगठन सुदृढ हुने बताएका छन् भने केहीले पुस्तान्तरणको कुरा पार्टीलाई नयाँ ऊर्जासँग जोड्ने माध्यम भएको तर्क पनि गरेका छन् ।

तर नेतृको भनाइमा रहेको “बाहिरी बकवास कुनै आवश्यक छैन” भन्ने वाक्यले उनले पार्टीका आन्तरिक विषयमा बाह्य हस्तक्षेप र टिप्पणीलाई अस्वीकार गरेको स्पष्ट सन्देश दिएको देखिन्छ ।

उनको यो अभिव्यक्ति एमालेको आगामी नेतृत्व संरचना, विचार र दिशाबारे चलिरहेको बहसमा थप नयाँ कोणले चर्चा बढाउने निश्चित देखिन्छ ।