नेपाल लेखापढी कानुन व्यवसायी एसोसिएसनको ३१औं स्थापना दिवसमा शुभकामना आदान–प्रदान कार्यक्रम सम्पन्न

 

२८ असोज, काठमाडौं । नेपाल लेखापढी कानुन व्यवसायी एसोसिएसनको ३१औं स्थापना दिवसको अवसरमा राजधानीमा एक विशेष शुभकामना आदान–प्रदान कार्यक्रम सम्पन्न भएको छ । नेपाल लेखापढी कानुन व्यवसायी एसोसिएसन केन्द्रीय समितिको आयोजनामा सम्पन्न उक्त कार्यक्रममा लेखापढी तथा कानुनी क्षेत्रका अग्रज, पूर्व पदाधिकारी, नयाँ पुस्ताका पेशागत सदस्य तथा सरोकारवालाहरूको उल्लेखनीय सहभागिता रहेको थियो ।

कार्यक्रमको अध्यक्षता एसोसिएसनका केन्द्रीय अध्यक्ष सिताराम दाहालले गरेका थिए । आफ्नो अध्यक्षीय मन्तव्यमा अध्यक्ष दाहालले नेपालमा लेखापढी र कानुन व्यवसायलाई मर्यादित, विश्वसनीय र जनउत्तरदायी पेशाका रूपमा स्थापित गर्न सबै सदस्यले आ–आफ्नो क्षेत्रमा इमानदारीपूर्वक योगदान दिनुपर्ने आवश्यकता औंल्याए । उनले हालको राजनीतिक, प्रशासनिक र सामाजिक संक्रमणकालीन अवस्थाले लेखापढी पेशामा पनि नयाँ चुनौतीहरू थपेको उल्लेख गर्दै पारदर्शिता, जिम्मेवारी र पेशागत नैतिकता मजबुत बनाउनेतर्फ एसोसिएसनले निरन्तर काम गरिरहेको बताए ।

जेन्जी आन्दोलनपछि देशमा देखिएको नयाँ सोच र प्रणालीगत परिवर्तनबारे पनि दाहालले टिप्पणी गर्दै भने, “अब हामीले हरेक पेशालाई जवाफदेही र राष्ट्र निर्माणमुखी बनाउनुपर्छ । लेखापढी कानुन व्यवसाय पनि यसको अपवाद होइन । हाम्रो काम देशको आर्थिक अनुशासन, सुशासन र जवाफदेहितासँग प्रत्यक्ष जोडिएको छ, त्यसैले हामीले आफैंबाट सुधारको उदाहरण देखाउनुपर्छ ।”

एसोसिएसनका महासचिव हरि प्रसाद पौडेलले स्वागत मन्तव्य राख्दै, संस्थाको ३१ वर्षे यात्रा गौरवमय रहेको बताए । उनले लेखापढी पेशाले राष्ट्रको आर्थिक नीतिनिर्माणदेखि बजेट पारदर्शिता र स्थानीय तहसम्मको वित्तीय अनुशासनमा महत्वपूर्ण योगदान पुर्‍याएको स्मरण गराए । साथै उनले एसोसिएसनका क्रियाकलापहरू अझ सुदृढ र व्यावहारिक बनाउन सबै सदस्यको एकता र सक्रियता आवश्यक रहेको जोड दिए ।

त्यसैगरी, निवर्तमान महासचिव नवराज दाहालले आफ्नो कार्यकालको अनुभव बाँड्दै संस्थाले अनेक कठिनाइका बीच पनि पेशाको प्रतिष्ठा जोगाउन निरन्तर लडाइँ गरेको उल्लेख गरे । उनले आगामी पुस्तालाई अझ अध्ययनशील, दक्ष र पारदर्शी बन्न प्रेरित गर्ने गरी कार्यक्रमहरू सञ्चालन गर्न आग्रह गरे ।

कार्यक्रममा निबर्तमान अध्यक्ष तेज प्रसाद ढकालले पनि मन्तव्य राख्दै लेखापढी कानुन व्यवसायीहरू राष्ट्रका आर्थिक संरक्षक हुन् भन्ने धारणा व्यक्त गरे । उनले पेशागत अनुशासन र सेवा भावना नै व्यवसायको आधार हो भन्दै आगामी दिनमा एसोसिएसनले समाजमा विश्वसनीयता र भरोसाको प्रतीक बन्ने विश्वास व्यक्त गरे ।

सो अवसरमा उपस्थित अतिथिहरूले पनि एसोसिएसनको ३१औं वार्षिकोत्सवको शुभकामना व्यक्त गर्दै संस्थाले आगामी दिनमा अझ सशक्त संस्थागत विकास र नीति सुधारका क्षेत्रमा प्रभावकारी भूमिका खेल्ने अपेक्षा व्यक्त गरे । कार्यक्रमको औपचारिक सत्रपछि अतिथिहरूबीच आपसी शुभकामना आदान–प्रदान, फोटोसेसन र मैत्रीपूर्ण छलफल पनि भएको थियो ।

नेपाल लेखापढी कानुन व्यवसायी एसोसिएसनले विगत तीन दशकदेखि देशभरका लेखापढी तथा कानुन व्यवसायीहरूलाई एकै मञ्चमा ल्याउँदै पेशागत अधिकार, मर्यादा र सीप विकासका लागि निरन्तर क्रियाशील रहँदै आएको छ । ३१औं स्थापना दिवसको यो अवसर संस्थाको विगतको उपलब्धिलाई सम्झँदै आगामी लक्ष्य निर्धारण गर्ने अवसरको रूपमा मनाइएको आयोजकले जनाएको छ ।