वर्तमान गठबन्धन सरकार प्रति ओलीको कडा टिप्पणी

 

 

रुपन्देही २५ बैशाख, नेकपा एमालेका अध्यक्ष केपी शर्मा ओलीले वर्तमान गठबन्धन सरकार प्रति कडा टिप्पणी गरेका छन् । उनले वर्तमान गठबन्धन सरकार बनेपछि देशमै अलच्छिन पसेको बताए । आइतबार बुटवलमा आयोजित चुनावी सभालाई सम्बोधन गर्दै अध्यक्ष ओलीले यस्तो बताएका हुन । उनले सरकारले पैसा छैन भन्दै विकासे आयोजनाका बजेट काटेको भन्दै एमालेले कहिल्यै पैसा छैन नभनेको दावी गरे ।

‘यो बाटो चौडा गर्न पैसा छैन भनेन, मेडिकल कलेजका लागि पैसा छैन भनेन’, उनले भने ‘अर्को सभागृहका लागि पैसा छैन भनेन, अरु बाटाहरु र नदी नियन्त्रणका लागि पैसा छैन भनेन ।’ उनले एमाले नेतृत्वको सरकारले देशभरका विकास निर्माणका काममा पैसा छैन भनेर नभनेको भन्दै भने, ‘यो गठबन्धन आयो पैसा छैन मात्रै भन्छ ।’

उनले आफु देशभरका कार्यक्रममा जाँदा जनताले मुलुकमा पाँच दलीय गठबन्धन छ भन्ने नै थाहा नभएको भन्दै एमाले मात्रै छ भन्ने जनताले बुझेको बताए ।
उनले कस्तो अलच्छिन पस्यो देशमा भनेर प्रश्न गरे । ‘कस्तो अलच्छिन पस्यो देशमा ? देशमै अलच्छिन पस्यो । यो ३० गतेको निर्वाचनले यस अलच्छिनलाई जरैसमेत उखेलेर र टकटक्याएर फाल्नुपर्छ’, ओलीको टिप्पणी छ । उनले वैशाख ३० गतेको निर्वाचनले फ्याक्ने कामको सुरुवात हुने पनि उनले बताए ।