सुदन किराँतिको भनाइप्रति एमाले नेताहरूको आपत्ति, ‘सुरेन्द्र पाण्डे जस्तो नेता पार्टी छोड्दैनन्’

 

 

१३ पुष,काठमाडौँ । नेकपा एमालेका महासचिव पदमा झिनो मतान्तरले पराजित नेता सुरेन्द्र पाण्डेलाई पार्टीभित्र विद्रोह गरी बाहिर आउन प्रेरित गर्ने आशयको भनाइप्रति एमाले नेताहरूले कडा आपत्ति जनाएका छन् ।  सुदन  किराँतिकोअभिव्यक्तिप्रति असहमति जनाउँदै एमाले नेताहरूले त्यसलाई गैरजिम्मेवार र हास्यास्पद टिप्पणीको संज्ञा दिएका छन् ।

एमाले नेताहरूका अनुसार सुरेन्द्र पाण्डे पार्टीका होनहार, बौद्धिक र सैद्धान्तिक रूपमा परिपक्व नेता हुन् भन्ने कुरा मन्त्रीस्तरको जिम्मेवारी सम्हालेका  किराँतिलाई राम्रोसँग थाहा हुनुपर्ने हो । पार्टीप्रति निष्ठा, आदर्श र सिद्धान्तमा सधैं अडिग रहने पाण्डे जस्तो नेतामाथि रिस, द्वेष वा ईर्ष्याबाट प्रेरित टिप्पणी गर्नु आफैंमा दुर्भाग्यपूर्ण भएको उनीहरूको भनाइ छ ।

एमाले निर्माणमा पाण्डेको योगदान कार्यकर्तामाझ घामजत्तिकै छर्लङ्ग रहेको उल्लेख गर्दै नेताहरूले प्रतिस्पर्धामा जित–हार हुनु स्वाभाविक राजनीतिक प्रक्रिया भएको बताएका छन् । निर्वाचनमा पराजित हुँदैमा पार्टी छोड्ने, पलायन हुने वा आत्मसमर्पण गर्ने स्वभाव सुरेन्द्र पाण्डे जस्तो खारिएको नेतासँग मेल नखाने उनीहरूको ठम्याइ छ ।

नेताहरूले सुदन  किराँतिलाई आफ्नै राजनीतिक बाटो रोज्ने अधिकार रहेको उल्लेख गर्दै, नयाँ पार्टी बनाउने हो भने त्यसमा सद्भावना रहने पनि स्पष्ट पारेका छन् । तर अर्को पार्टीका नेताको मन लोभ्याएर आफ्नो पक्षमा पार्न सकिन्छ भन्ने सोच दिवास्वप्न मात्र हुने चेतावनीसमेत उनीहरूले दिएका छन् ।

एमालेको ११औँ राष्ट्रिय महाधिवेशन भर्खरै सम्पन्न भएकाले त्यहाँ देखिएका कमजोरी र सबल पक्षको समीक्षा पार्टीभित्रै हुने नेताहरूको भनाइ छ । कार्यकर्ताले ठिक र बेठिक छुट्याउन सक्ने क्षमता राख्ने उल्लेख गर्दै, एमाले जनताको मन र मस्तिष्कमा सधैं जीवित रहने उनीहरूको दाबी छ ।

नेताहरूका अनुसार एमालेभित्र सबै नेताहरू एउटै चरित्र र कार्यशैलीका हुँदैनन् । तथापि पार्टीलाई अझ उन्नत स्तरमा पुर्‍याउने अभियानमा आफूहरू निरन्तर लागिरहने प्रतिबद्धता उनीहरूले व्यक्त गरेका छन् ।

सुरेन्द्र पाण्डेको योगदान स्मरण गर्दै एमाले नेताहरूले उनलाई सफल पूर्व अर्थमन्त्री, राष्ट्रिय सभाका प्रमुख सचेतक, संसदीय दलका उपनेता, संविधान लेखन मस्यौदा समितिका मस्यौदाकार, विद्यार्थी र युवा संगठनदेखि कर्णाली, कोशी, उपत्यका, बागमती र सुदूरपश्चिमसम्म कमाण्ड सम्हालेका अनुभवी नेता भएको बताएका छन् । पछिल्लो समय विश्वव्यापी रूपमा चर्चामा आएको डाटा पुँजीवादका विषयमा नेपालकै चर्चित विज्ञका रूपमा पाण्डे स्थापित भएको उनीहरूको भनाइ छ ।