देशमा विकासको गति बढाउन गठबन्धनले जित्न जरुरीः डा महत

मकवानपुर २२ कात्तिक । नेपाली कांग्रेसका प्रवक्ता डा। प्रकाशशरण महतले केपी आली कै कारण देशमा राजनीतिक अस्थिरता बढेको बताएका छन । । उनले एमाले नेतृत्वको सरकार रहदाँ देशमा थुप्रै प्रकारका संकटहरु उत्पन्न भएको र त्यसको असर अहिले देखापरेको बताए । मंगलबार हेटौंडामा आयोजित पत्रकार सम्मेलनमा डा महतले यस्तो बताएका हुन ।

उनले एमाले अध्यक्ष केपी शर्मा ओलीको नेतृत्व सहिष्णु नभएकाले सो पार्टीले देश र संविधानको रक्षा गर्न नसक्ने बताए । ‘ओली जीको नेतृत्व देशलाई जोड्ने प्रकृतिको छैन । उहाँको नेतृत्व सहिष्णु पनि छैन,’ उनले भने । डा महतले अघिल्लो निर्वाचनमा नेकपाले पाँचवर्षे म्यान्डेट प्राप्त गरेपनि त्यसलाई जोगाउन नसकेको बताए ।

‘पाँचवर्षे म्यान्डेट प्राप्त नेकपा फुटेर अहिले तीन टुक्रा भएको छ । त्यसमध्ये दुईवटा दल अहिले हामीसँग गठबन्धनमा हुनुहुन्छ’, उनले थपे ।

उनले देशमा विकासको गति बढाउन गठबन्धनले जित्न जरुरी रहेको औंल्याए । उनले मिश्रित निर्वाचन प्रणाली भएका कारण कुनै पनि दलको बहुमत नआउने भएका कारण गठबन्धन गर्नुपरेको बताए । ‘चुनावपश्चात् गठबन्धन गर्नुभन्दा अहिले लय मिलेकै समयमा गरौं भनेर अगाडि बढेका हौं,’, उनले भने ।

निर्वाचनपश्चात् बन्ने सरकारको नेतृत्व गर्ने विषयमा सत्तारुढ गठबन्धनभित्र सहमति भइनसकेको उनको भनाइ छ । उनले आगामी सरकारको नेतृत्व प्रधानमन्त्री देउवा वा माओवादी केन्द्रका अध्यक्ष पुष्पकमल दाहाल प्रचण्डले गर्ने भन्ने विषयमा कुनै औपचारिक निर्णय वा सहमति नभएको उनले प्रष्ट पारे ।