चाडपर्वको मौका छोपेर अत्यावश्यक सामानमा मनलाग्दी मूल्यवृद्धि

डा डीआर उपाध्याय
चाडपर्वको मौका छोपेर अत्यावश्यक सामानमा मनलाग्दी मूल्यवृद्धि गरिएको छ । सरकारले बजार अनुगमनका लागि त्यति प्रभावकारी भूमिका खेलेको देखिदैन । सरकार तथा सरकारी निकायले अनुगमनका नाममा अनुगमन गरे जस्तो मात्र गरेका छन । सरोकारवाला निकायले बजार अनुगमनमा प्रभावकारिता देखाउनु पर्ने आबश्यकता देखिएको छ । दैनिक उपभोग्य सामानमा मनलाग्दी मूल्यवृद्धि गरिदा सर्वसाधारणको ढाड सेकिएको छ । बजारमा कुनै सामान किनिनसक्नु भएको छ । आज सरकार तथा सरकारी निकाय यो बिषयमा मौन भए जस्तो देखिन्छन् । आज अत्यावश्यक सामानमा दैनिक रुपमा मूल्य वृद्धि भइरहदा आमउपभोक्ता ठूलो मर्कामा परिरहेका छन । सामान्य मानिसका लागि जीविकोपार्जन गर्न समेत धौं धौं परिरहेको छ । चामल, दाल, पिठो, तेल, हरियो तरकारी तथा लत्ताकपडामा पटक पटक मूल्य वृद्धि भइरहेको छ । दसैंमा पनि मूल्यवृद्धि भयो, तिहारमा पनि मूल्यवृद्धि भएको छ । मूल्यवृद्धिले जनतामा आर्कोश थपिएको छ । सरकारी निकायले यस्तो अवस्थामा इमानदारितापूर्वक बजार अनुगमन गर्न जरुरी छ । यो बिषयमा सरकार गम्भिर बन्नु पर्ने अबस्था देखिएको छ । सरकार यो बिषयमा गम्भिर नबन्ने हो भने समस्या थप जटिल बन्न सक्छ । जनताले चुनेर पठाएका जनप्रतिनिधिहरु नै जनता प्रति इमान्दार भएको देखिदैन । स्थानीय तहका सरकारहरुले पनि बजार अनुगमनलाई तिब्रता दिनु पर्छ । पर्वहरूमा मूल्यवृद्धि हुदा उपभोक्ता समस्यामा पर्छन । नेपाली जनता रमाउने भनेकै पर्वहरूमा हो । पैसा हुनेहरुलाई त पर्वहरूमा रमाइलै हुने भो तर कमाइ नहुनेहरू पनि ऋणकर्जा गरी पर्व मनाउने गर्छन् । यस्तो बेलामा व्यापारीहरूले कृत्रिम अभाव सिर्जना गर्नु हुदैन । कृत्रिम अभाव सिर्जना गर्नु भनेको ठूलो पाप हो । यस्तो पाप गर्नु हुदैन । पैसा कमाउने मौका यहि हो भनेर बजारमा मनपरि गर्नु राम्रो होइन । कालाबजारीले गर्दा आम उपभोक्ताहरु पीडित छन । सरकारी तहबाट मेलापर्वमा मात्र होइन, दिनौं जसो बजार अनुगमन हुनु पर्छ । त्यसो भयो भने मात्र कालाबजारीहरु सलबलाउन पाउदैनन् । अब सरकार माहतहतका निकाय चुप लागेर बस्नु हुदैन । चुप लागेर बस्ने हो भने व्यापारीहरूले जनता चुस्ने मौका पाउँछन ।