मनसुन सक्रिय : ३४ भन्दा बढी जिल्लाका साना नदीमा बाढीको जोखिम, दुई दिन उच्च सतर्कता अपनाउन आग्रह

काठमाडौं । मनसुनी वर्षा निरन्तर सक्रिय भएसँगै देशभरका ३४ भन्दा बढी जिल्लामा बहने साना नदी तथा खोलाहरूमा आकस्मिक बाढी आउने जोखिम बढेको छ। बाढी पूर्वानुमान महाशाखाले आजदेखि आगामी दुई दिनसम्म विशेष सावधानी अपनाउन सर्वसाधारण, स्थानीय तह तथा सडक प्रयोगकर्तालाई आग्रह गरेको छ।

महाशाखाले सोमबार जारी गरेको बाढी पूर्वानुमान बुलेटिनअनुसार झापा, इलाम, पाँचथर, ताप्लेजुङ, सङ्खुवासभा, दोलखा, सिन्धुपाल्चोक, काठमाडौं, भक्तपुर, ललितपुर, गोरखा, लमजुङ र चितवनका साना नदी तथा खोलाहरूमा पानीको बहाव उल्लेख्य रूपमा बढ्ने सम्भावना रहेको छ। यस्तै कास्की, पाल्पा, स्याङ्जा, नवलपरासी, रुपन्देही, कपिलवस्तु, दाङ, बाँके, बर्दिया, कैलाली, सुर्खेत, दैलेख, कालिकोट, जाजरकोट, रुकुम पश्चिम, बैतडी, दार्चुला, डोटी, डडेल्धुरा र अछामका साना नदी तथा खोलाहरू पनि बाढीको मध्यम जोखिममा रहेको जनाइएको छ।

महाशाखाका अनुसार जोखिम आजमा मात्र सीमित रहने छैन। भोलि र पर्सिसम्म कोशी, मधेस, बागमती, गण्डकी र लुम्बिनी प्रदेशका अधिकांश साना नदीहरूमा पानीको बहाव एक्कासि बढ्न सक्ने सम्भावना छ। कर्णाली र सुदूरपश्चिम प्रदेशका केही नदीहरूमा पनि सोही अवधिमा बहाव बढ्ने अनुमान गरिएको छ।

यद्यपि देशका ठूला नदीहरूको अवस्था भने हालसम्म सामान्य रहेको महाशाखाले जनाएको छ। आज बिहानको मापनअनुसार कोशी, नारायणी, बागमती, कर्णाली, महाकाली तथा तिनका प्रमुख सहायक नदीहरूको जलसतह सतर्कता तहभन्दा तल रहेको छ। कन्काई, कमला, बबई, पूर्वी राप्ती तथा पश्चिम राप्ती नदीको बहाव पनि सुरक्षित सीमाभित्र रहेको जानकारी दिइएको छ।

महाशाखाले मनसुनको प्रभाव अझै केही दिन कायम रहने भएकाले साना खोला तथा नदी आसपास बसोबास गर्ने नागरिक, यात्रा गरिरहेका सवारी चालक तथा यात्रु, निर्माण कार्यमा संलग्न श्रमिक र स्थानीय प्रशासनलाई उच्च सतर्कता अपनाउन आग्रह गरेको छ। विशेषगरी वर्षाका बेला नदी तथा खोलामा अनावश्यक आवतजावत नगर्न, जोखिमयुक्त क्षेत्रमा बसोबास गर्नेले स्थानीय प्रशासनको सूचनालाई पालना गर्न तथा सम्भावित विपद्को सामना गर्न पूर्वतयारी अवस्थामा रहन महाशाखाले अनुरोध गरेको छ।