रवि–बालेन एउटै दलबाट चुनाव लड्ने सहमति, रास्वपामा ७ बुँदे सम्झौता

 

१३ पुस, काठमाडौं । राष्ट्रिय स्वतन्त्र पार्टी, रास्वपाका सभापति रवि लामिछाने र काठमाडौं महानगरपालिकाका मेयर बालेन शाह एउटै दलमार्फत प्रतिनिधिसभा निर्वाचनमा प्रतिस्पर्धा गर्ने सहमतिमा पुगेका छन्।

आइतबार दुवै नेताबीच सात बुँदे सम्झौतापत्रमा हस्ताक्षर भएको हो। सम्झौताअनुसार रास्वपाको नाम, झण्डा र चुनाव चिन्ह यथावत् राख्दै आगामी निर्वाचनमा संयुक्त रूपमा अघि बढ्ने निर्णय गरिएको छ।

सम्झौतामा पार्टीको केन्द्रीय नेतृत्व रवि लामिछानेले सम्हाल्ने र निर्वाचनपछि संसदीय दलको नेता तथा भावी प्रधानमन्त्रीको उम्मेदवारका रूपमा बालेन शाहलाई अघि सारिने उल्लेख छ। बालेन शाह पार्टी राजनीतिमा सक्रिय हुने र आवश्यक परे काठमाडौं महानगरपालिकाको मेयर पदबाट राजीनामा दिन सक्ने संकेत पनि सम्झौतामा गरिएको छ।

दुवै नेताले भ्रष्टाचार र कुशासनविरुद्धको जनआन्दोलनलाई अपनत्व लिने, नीतिगत तथा संरचनागत सुधार गर्ने र आगामी १० वर्षभित्र नेपाललाई मध्यम आय भएको मुलुक बनाउने लक्ष्यमा सहकार्य गर्ने प्रतिबद्धता व्यक्त गरेका छन्।

सम्झौताअनुसार समानुपातिक उम्मेदवारहरू रास्वपामार्फत नै प्रतिस्पर्धा गर्ने र पार्टीसम्बन्धी कागजातहरू निर्वाचन आयोगमा छिट्टै अद्यावधिक गरिने जनाइएको छ।

तर, अन्य वैकल्पिक राजनीतिक शक्तिहरूसँगको एकता र उम्मेदवार व्यवस्थापनसम्बन्धी विस्तृत विषय भने सम्झौतामा खुलाइएको छैन।