ओलीको भब्य भाषण, पुराना कार्यकर्तालाई गरे यस्तो आह्वान !

 

उदयपुर ११ चैत्र । नेकपा एमालेका अध्यक्ष केपी शर्मा ओलीले भब्य भाषण गरेका छन । उनले माधवकुमार नेपाललाई पाकेको फिलो फुटेर गएको संज्ञा दिए । ओलीले एमाले नफुटेको दाबी गर्दै एमालेबाट फुटेर बनेको नेपालको पार्टीलाई पाकेको पिलो आफैँ फुटेर गएको बताएका हुन्।

उनले भने, ‘एमालेका साथीहरूलाई आग्रह गर्न चाहन्छु, एमालेमा नेपाल पाकेको पिलो जस्तै भएका थिए, निचोर्नुपर्ने थियो, आफैँ फुटेर गए, ढुक्क भयो, पिलो निचोरिदैमा ओजन घटेको हुँदैन, नेकपा समाजवादी बनेर एमाले घटेको छैन, पिलो बाहिर निस्केपछि दुई चार केजी ओजन बढेको छ। साथीहरू निराश हुने होइन। एमाले फुटेको छैन।’
ओलीले देशमा सुशासन स्थापना र विकास गर्ने पार्टी एमाले नै भएको दाबी । उदयपुरको सदरमुकाम गाईघाटस्थित लोकतान्त्रिक चोकमा एमालेले आज आयोजना गरेको कार्यक्रममा उनले भने, ‘एमाले हिजो पनि देश र जनताको विकास तथा सुशासन स्थापना गर्न प्रतिबद्ध थियो र आज पनि अन्य पार्टीभन्दा बढी प्रतिबद्ध छ ।’

अहिले वर्तमान पाँच दलको संयुक्त सरकार उल्टो दिशातिर चलिरहेका कारण देश अस्थिरतातिर गइरहेको आरोपसमेत अध्यक्ष ओलीको थियो । एमालेले देशमा गरिबी हटाउन सडक, भौतिक संचरना निर्माणको काम, लोककल्याणकारी कार्यको लागि देशको अन्य राजनीतिक दलहरूभन्दा दुईचार कदम अगाडि रहेको दाबी गर्दै उनले अन्य राजनीतिक दल देश विकासको काम गर्न र सुशासन स्थापनामा असफल भएको आरोप लगाए।

आफ्नो नेतृत्वमा बहुमतको सरकार रहेको बेला आफ्नै पार्टीका केही स्वार्थी नेता र अन्य पार्टीले आफूले राम्रो काम गरिरहेको कारण सरकार ढाल्ने काम गरेर विकास गर्न नदिएको अध्यक्ष ओलीले गुनासो गरे। उनले आगामी निर्वाचनमा एमाले निर्वाचित भएपछि पार्टीले देश विकासलाई निरन्तरता दिने बताए।

अध्यक्ष ओलीले भने, ‘अहिले पनि एमाले देशको सबैभन्दा ठूलो प्रतिपक्ष पार्टी हो, आगामी वैशाख ३० को स्थानीय निर्वाचन सम्पन्न भएपछि पनि एमाले देशको सबैभन्दा ठूलो राजनीतिक पार्टी बन्ने छ ।’ उनले अलमलिएका पुराना कार्यकर्तालाई बेलैमा एमालेमा सङ्गठित हुन आह्वान गरे। एमालेले आगामी निर्वाचनबाट बहुमतको सरकार गठन गरेपछि लोककल्याणकारी कार्य र देश विकासको कार्यलाई झनै तीव्रता दिने विश्वास दिलाउँदै अध्यक्ष ओलीले देशको हित हुने तथा कसैसँग नझुक्ने नीतिसमेत लिने उल्लेख गरे ।