प्रचण्ड, देउवासहितका नेताहरु बारा र चितवन जाँदै, चुनावी सभालाई सम्बोधन गर्ने

खबरब्रेकिंग,काठमाडौं, बैशाख ७ गते । सत्तारुढ गठबन्धनले वैशाख १० गते हुने उपनिर्वाचनका लागि चुनावी प्रचार तीव्र पारेको छ। बारा २, चितवन २ र तनहुँ १ मा हुने उपनिर्वाचनका लागि मत माग्न गठबन्धनका शीर्ष नेताहरु नै धाउन थालेका छन्।

गठबन्धनले आज (बिहीबार) बारा र चितवनमा चुनावी सभा गर्दै छ। चुनावी सभालाई सम्बोधन गर्ने प्रधानमन्त्री पुष्पकमल दाहालसहित शीर्ष नेताहरु बारा र चितवन पुग्ने बताइएको छ। गठबन्धनले बुधबार तनहुँ १ मा चुनावी सभा गरिसकेको छ ।

प्रधानमन्त्री पुष्पकमल दाहाल प्रचण्डसहित पूर्वप्रधानमन्त्रीहरु नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष माधव कुमार नेपाल र नेकपा समाजवादीका अध्यक्ष डा बाबुराम भट्टराईले चुनावी सभालाई सम्बोधन गर्ने कार्यक्रम छ।
लोकतान्त्रिक बाम गठबन्धनले आज पूर्वी चितवनको कालिका नगरपालिकामा चुनावी सभा आयोजना गरेको छ। शीर्ष नेताहरुले बिहीबार बारा र चितवनको चुनावी सभालाई सम्बोधन गर्नेछन्।

गठबन्धनका तर्फबाट बारा २ मा जनता समाजवादी पार्टीका अध्यक्ष उपेन्द्र यादव, चितवन २ मा नेपाली कांग्रेसका जितनारायण श्रेष्ठ र तनहुँ १ मा नेपाली कांग्रेसका गोविन्द्र भट्टराई उम्मेदवार छन्।