म तपाईंहरूको घरदैलोमा आउँदैछुः कास्की क्षेत्र नम्बर १ का उम्मेदवार तिलक रानाभाट

कास्की । नेपाली काँग्रेसका तर्फबाट प्रतिनिधिसभा सदस्यका उम्मेदवार तिलक रानाभाटले कास्की क्षेत्र नम्बर १ मा घरदैलो अभियानलाई तीव्र बनाउँदै जनतासँग प्रत्यक्ष संवाद सुरु गरेका छन्। उनले जनताको सुझाव, गुनासा र अपेक्षालाई आफ्नो मुख्य एजेन्डा बनाउँदै घर–घरमा पुगेर भेटघाट गर्ने बताएका छन्।

फेसबुकमार्फत सार्वजनिक गरिएको सन्देशमा उम्मेदवार रानाभाटले आफू जनताको ढोकासम्म आइरहेको स्पष्ट पार्दै भनेका छन्, “म तपाईंहरूको घरदैलोमा आउँदैछु—तपाईंका सुझाव र गुनासाहरू सुन्न, तपाईंहरूसँग भेटघाट गर्न।” उनले प्रत्यक्ष भेटघाट मात्र होइन, अनलाइन माध्यमबाट पनि आफ्ना कुरा राख्न सकिने व्यवस्था मिलाइएको जानकारी दिएका छन्।

उनका अनुसार नागरिकहरूले अनलाइनमार्फत पठाएका गुनासा र सुझावहरूलाई औपचारिक रूपमा संकलन गरिनेछ र प्रत्येक विषयमा समाधानसहित प्रतिक्रिया दिइनेछ। “हामी केवल आश्वासन दिने होइन, समस्या पहिचान गरेर समाधान खोज्ने राजनीतिक संस्कार स्थापित गर्न चाहन्छौं,” रानाभाटले बताएका छन्।

घरदैलो अभियानको क्रममा शिक्षा, स्वास्थ्य, रोजगारी, पूर्वाधार विकास, युवाको भविष्य र सुशासनजस्ता विषयमा जनताको चासो सुन्ने र ती विषयलाई नीति तथा कार्यक्रममार्फत संसदमा उठाउने प्रतिबद्धता पनि उनले जनाएका छन्। स्थानीय समस्या स्थानीयकै सहभागितामा समाधान गर्ने काँग्रेसको परम्परालाई अझ बलियो बनाउने उनको दाबी छ।

नेपाली काँग्रेस कास्की क्षेत्र नम्बर १ ले रानाभाटको नेतृत्वमा जनतामैत्री र उत्तरदायी अभियान सञ्चालन गरिएको जनाएको छ। पार्टीले यो अभियानलाई केवल चुनावी औपचारिकतामा सीमित नराखी जनविश्वास पुनःस्थापना गर्ने अवसरका रूपमा लिएको बताएको छ।

उम्मेदवार रानाभाटले   कास्की क्षेत्र नम्बर १ का सम्पूर्ण दाजुभाइ तथा दिदीबहिनीहरूलाई आफ्नो सुझाव, आलोचना र सल्लाह निसंकोच राख्न आग्रह गर्दै लोकतन्त्रको बल जनताकै आवाज भएको दोहोर्‍याएका छन्।