संस्थाको हितविपरीत गतिविधि स्वीकार्य हुँदैन : अध्यक्ष श्रेष्ठ

काठमाडौं । ग्रिल तथा स्टिल व्यवसायी महासंघ नेपालका अध्यक्ष ठुलोबाबु श्रेष्ठले महासंघमा जिम्मेवार पदमा रहेका प्रत्येक पदाधिकारी तथा सदस्य संस्थाको विधान, नीति, निर्णय र व्यवसायीहरूको सामूहिक हितप्रति उत्तरदायी हुनुपर्ने बताएका छन्।

अध्यक्ष श्रेष्ठले संस्थाको जिम्मेवारीमा रहेर संस्थाकै हितविपरीत गतिविधि गर्ने, व्यवसायीबीच भ्रम तथा विभाजन सिर्जना गर्ने र महासंघको गरिमा एवं उद्देश्यमा असर पर्ने गतिविधिलाई सामान्य रूपमा लिन नसकिने स्पष्ट पारेका छन्।

उनले महासंघभित्र सबै पदाधिकारी तथा सदस्यलाई आफ्नो विचार राख्ने, असहमति व्यक्त गर्ने र संस्थागत सुधारका लागि आवाज उठाउने अधिकार रहेको उल्लेख गर्दै त्यस्ता गतिविधि विधान, प्रचलित कानुन र संस्थागत मर्यादाको सीमाभित्र रहनुपर्नेमा जोड दिएका छन्।

“कुनै पनि व्यक्ति संस्थाभन्दा माथि हुँदैन। पदसँगै जिम्मेवारी र जवाफदेहिता पनि आउँछ,” अध्यक्ष श्रेष्ठले भनेका छन्। संस्थाको हितविपरीत वा कानुनविपरीत कुनै कार्य भएमा सम्बन्धित विषयलाई महासंघको विधान तथा प्रचलित कानुनबमोजिम आवश्यक प्रक्रियामा लैजान सकिने उनको भनाइ छ।

अध्यक्ष श्रेष्ठले महासंघको धारणा कुनै व्यक्तिलाई व्यक्तिगत रूपमा लक्षित गर्ने उद्देश्यले नभएको स्पष्ट पार्दै व्यवसायीहरूको एकता, अधिकार, सम्मान र सुरक्षित भविष्यका लागि संस्थालाई अझ जिम्मेवार, अनुशासित र बलियो बनाउनु मुख्य उद्देश्य रहेको बताएका छन्।

उनले महासंघका सम्पूर्ण पदाधिकारी तथा सदस्यलाई संस्थागत एकता र मर्यादा कायम राख्दै व्यवसायीहरूको सामूहिक हितलाई प्राथमिकतामा राखेर अघि बढ्न आग्रह गरेका छन्। “पद अधिकार मात्र होइन, जिम्मेवारी र जवाफदेहिता पनि हो,” अध्यक्ष श्रेष्ठले भनेका छन्।

महासंघले व्यवसायीहरूबीच एकता कायम गर्दै संस्थाको विधान, नीति र निर्णयको सम्मान गर्न तथा व्यक्तिगत स्वार्थभन्दा संस्थागत हितलाई सर्वोपरि राख्न सबैलाई आग्रह गरेको छ। अध्यक्ष श्रेष्ठले “एकताबद्ध बनौँ, मर्यादित बनौँ र महासंघको संस्थागत हितलाई सर्वोपरि राखौँ” भन्ने सन्देश दिएका छन्।