बागमती पेट्रोलियम डिलर्स एशोसिएशनको अध्यक्षमा ईश्वर लामा निर्वाचित

काठमाडौं । बागमती पेट्रोलियम डिलर्स एशोसिएशनको नेतृत्वमा नयाँ पुस्ताको टिम चयन भएको छ। सम्पन्न निर्वाचनले संस्थाको आगामी कार्यदिशा तय गर्ने नयाँ कार्यसमितिलाई जिम्मेवारी दिएको छ। अध्यक्षमा ईश्वर लामा निर्वाचित भएसँगै बागमती प्रदेशका पेट्रोलियम व्यवसायीबीच व्यावसायिक एकता, संस्थागत सुदृढीकरण र व्यवसायीका साझा मुद्दा समाधानप्रति नयाँ अपेक्षा जागेको छ।

अध्यक्ष पदका लागि भएको प्रतिस्पर्धामा ईश्वर लामाले ७७ मत प्राप्त गर्दै स्पष्ट बहुमतका साथ विजय हासिल गरे। उनका निकटतम प्रतिद्वन्द्वी प्रल्हाद तिमिल्सिनाले ४२ मत प्राप्त गरे। निर्वाचन परिणामले व्यवसायीहरूको विश्वास लामाको नेतृत्वतर्फ केन्द्रित भएको संकेत गरेको छ।

अन्य पदहरूको नतिजा पनि उल्लेखनीय रह्यो। विशिष्ट उपाध्यक्षमा कुमार श्रेष्ठ ७३ मतसहित निर्वाचित भए। वरिष्ठ उपाध्यक्ष पदमा विष्णुकुमार खड्काले ८३ मत प्राप्त गर्दै विजय हासिल गर्दा उनका प्रतिस्पर्धी लिलेश्वर प्रसाद प्रधानले ४५ र भरत सापकोटाले ३२ मत पाए।

प्रथम उपाध्यक्षमा केशव कासुला तथा द्वितीय उपाध्यक्षमा नितेश सरिया निर्विरोध निर्वाचित भएका छन्। सचिवमा रामप्रसाद तिमिल्सिना ६९ मतसहित विजयी भए भने उनका प्रतिस्पर्धी राजकुमार साहले ४६ मत प्राप्त गरे। कोषाध्यक्ष पदमा यसु प्रधान ६५ मतसहित निर्वाचित हुँदा जनार्दन फुयाल ५१ मतमा सीमित भए। सहसचिवमा पुरुषोत्तम रेग्मी ७३ मतसहित विजयी भए भने सहकोषाध्यक्षमा निकेश घिमिरे ४३ मत प्राप्त गर्दै निर्वाचित भए। उक्त पदमा शंकर अधिकारीले ३५ मत प्राप्त गरेका थिए। यसैगरी प्रकाशराज खड्का पनि ७६ मतसहित निर्वाचित भएका छन्।

कार्यकारी सदस्यतर्फ महेन्द्र घिमिरे, नवराज लामिछाने, सुगत मानन्धर, शंकर न्यौपाने, विशाल बखती, सुरेश दुवाल श्रेष्ठ र संजयकुमार श्रीवास्तव निर्वाचित भएका छन्। प्रतिस्पर्धामा रहेका सुनिल अवाले, ध्रुव भण्डारी, लिला सिंह ठकुरी र सन्तोष खुलाल भने विजयी हुन सकेनन्।

निर्वाचन अधिकृत राजेन्द्र श्रेष्ठ, शेखरबाबु कार्की तथा प्रमुख निर्वाचन अधिकृत सुवर्ण थापाले मतगणना सम्पन्न भएपछि अन्तिम नतिजा सार्वजनिक गरेका हुन्। निर्वाचन प्रक्रिया शान्तिपूर्ण र व्यवस्थित रूपमा सम्पन्न भएको जनाइएको छ।

नवनिर्वाचित कार्यसमितिले बागमती प्रदेशका पेट्रोलियम व्यवसायीका हकहित संरक्षण, व्यवसायिक एकता मजबुत बनाउने, इन्धन आपूर्ति व्यवस्थापनमा प्रभावकारी समन्वय गर्ने तथा व्यवसायसँग सम्बन्धित नीतिगत विषयमा सशक्त आवाज उठाउने प्रतिबद्धता जनाएको छ। संस्थागत सुधार, सदस्यका साझा समस्याको समाधान र व्यवसायमैत्री वातावरण निर्माणलाई आगामी कार्यकालको प्रमुख प्राथमिकताका रूपमा अघि बढाइने अपेक्षा गरिएको छ।