आत्मनिर्भर नेपाल निर्माणका लागि उत्पादन बढाउन टेकबहादुर पुन मगरको आह्वान

काठमाडौं । राष्ट्रिय स्वतन्त्र पार्टी (रास्वपा) का नेता टेकबहादुर पुन मगरले असार १५ अर्थात् राष्ट्रिय धान दिवसको अवसरमा सम्पूर्ण नेपाली दिदीबहिनी तथा दाजुभाइमा हार्दिक शुभकामना व्यक्त गर्दै कृषि उत्पादन बढाएर आत्मनिर्भर नेपाल निर्माणमा जुट्न सबैलाई आह्वान गरेका छन्।

उनले शुभकामना सन्देश जारी गर्दै खेत हुनेले धान रोप्न, पाखोबारी हुनेले उन्नत जातका फलफूल, मकै, कोदो, गहुँ, फापर तथा स्थानीय भूगोलअनुसार उपयुक्त बाली लगाउन आग्रह गरेका छन्। प्रत्येक नागरिकले आफ्नो क्षमता र सम्भावनाअनुसार उत्पादनमा सहभागी हुनुपर्नेमा उनले जोड दिएका छन्।

नेता पुनले “उत्पादन बढाऔँ, आयात घटाऔँ, आत्मनिर्भर नेपाल निर्माण गरौँ” भन्ने नारालाई व्यवहारमा उतार्नुपर्ने आवश्यकता औंल्याउँदै कृषि क्षेत्रलाई राष्ट्रको आर्थिक समृद्धिको प्रमुख आधारका रूपमा विकास गर्नुपर्ने बताएका छन्।

उनले कृषि उत्पादनलाई सम्मान गर्दै यस वर्षको असार १५ उत्साहपूर्वक मनाउन तथा समृद्ध र आत्मनिर्भर नेपालको निर्माणमा सबैले आ-आफ्नो स्थानबाट योगदान पुर्‍याउन आग्रह गरेका छन्।

उनका अनुसार स्वदेशमै उत्पादन वृद्धि, कृषिमा आधुनिक प्रविधिको प्रयोग र स्थानीय स्रोत–साधनको अधिकतम उपयोगमार्फत मुलुकलाई खाद्यान्नमा आत्मनिर्भर बनाउन सकिने भएकाले कृषि क्षेत्रलाई प्राथमिकतामा राखेर अघि बढ्नुपर्ने आवश्यकता रहेको छ।