हिमालयन लिटरेचर फेस्टिभल २०२६ काठमाडौंमा हुने

काठमाडौं । हिमालयन लिटरेचर फेस्टिभल एण्ड राइटर्स’ वर्कशप २०२६ आगामी मे २९ देखि जुन ५ सम्म काठमाडौंमा आयोजना हुने भएको छ । आयोजकहरूले दक्षिण एशियाकै प्रमुख अन्तर्राष्ट्रिय साहित्यिक जमघटमध्ये एक मानिने यस महोत्सवको औपचारिक घोषणा गरेका हुन् ।

काठमाडौंस्थित मल्ल होटलमा आयोजना हुने महोत्सवमा नेपालसहित विश्वका प्रतिष्ठित कवि, उपन्यासकार, संस्मरण लेखक, अनुवादक, चलचित्रकर्मी, पत्रकार, विद्वान् तथा उदाउँदा लेखकहरूको सहभागिता रहने जनाइएको छ । यस वर्षको महोत्सव उपचार, चेतना, सिर्जनशीलता, स्मृति तथा तीव्र परिवर्तनशील विश्वमा सांस्कृतिक संवादका विषयमा केन्द्रित रहने आयोजकले बताएका छन् ।

सप्ताहव्यापी कार्यक्रममा मास्टर क्लास, साहित्यिक कार्यशाला, मुख्य वक्तव्य, कविता वाचन, चलचित्र प्रदर्शन, सांस्कृतिक भ्रमण तथा साहित्य र कलाको रूपान्तरणकारी शक्तिमाथि केन्द्रित अन्तरविषयक छलफलहरू समावेश गरिएका छन् ।

महोत्सवमा पुलित्जर पुरस्कार विजेता कवि ट्रेसी के. स्मिथ र पल मल्ड्न, चर्चित उपन्यासकार जीन ह्यान्फ कोरेलिट्ज, कवि तथा अनुवादक टोनी बार्नस्टोन, हिमालयन कवि युयुत्सु शर्मा, आइरिश साहित्यिक सम्पादक मार्टिन डोयल तथा ब्रुकलिन ‘पोएट लौरिएट’ टिना चाङलगायत नेपाल, भारत, आयरल्यान्ड, अस्ट्रिया, पोल्यान्ड, संयुक्त राज्य अमेरिका तथा अन्य देशका साहित्यिक व्यक्तित्वहरूको सहभागिता रहनेछ ।

उद्घाटन समारोह हिमालयन तथा विश्व साहित्यिक परम्पराको सङ्गमलाई उत्सवका रूपमा मनाउने विशेष कार्यक्रममार्फत गरिने जनाइएको छ । महोत्सवभर कविता, संस्मरण, जादुई यथार्थवाद, कृत्रिम बुद्धिमत्ता (एआई) र सिर्जनात्मक लेखन, महिला साहित्य, आदिवासी आख्यान, आघात र उपचार, ध्यान र सिर्जना, अनुवाद तथा डिजिटल युगमा साहित्यको भविष्यजस्ता विषयमा छलफल हुनेछन् ।

महोत्सवले उदाउँदा साहित्यिक प्रतिभाहरूलाई पनि विशेष प्राथमिकता दिएको छ । युवा कविता मञ्च, मार्गदर्शन कार्यक्रम, कार्यशाला तथा अन्तर्राष्ट्रिय सहकार्यमार्फत नयाँ प्रतिभालाई प्रोत्साहन गरिने आयोजकले जनाएको छ । नेपाली तथा अंग्रेजी भाषामा लेख्ने नेपाली लेखक तथा कविहरूलाई अन्तर्राष्ट्रिय साहित्यिक व्यक्तित्वहरूसँगै विशेष रूपमा प्रस्तुत गरिनेछ ।

यस अवसरमा कवितामा आधारित आइरिश, अस्ट्रियन तथा पोलिस चलचित्रहरूको प्रदर्शन गरिनुका साथै काठमाडौं दरबार स्क्वायर, पाटन दरबार स्क्वायर, बौद्धनाथ, बुढानीलकण्ठ तथा नगरकोटलगायत सांस्कृतिक तथा प्राकृतिक सम्पदा स्थलहरूको भ्रमण कार्यक्रम पनि आयोजना गरिनेछ ।

महोत्सवले संवाद, सिर्जनशीलता तथा अन्तरसांस्कृतिक समझदारीको साझा मञ्चका रूपमा काठमाडौंलाई विश्व साहित्यिक गन्तव्यका रूपमा स्थापित गर्न थप योगदान पुर्‍याउने विश्वास व्यक्त गरिएको छ । कार्यक्रममा आरडी शर्माले मन्तव्य राख्नुभएको थियो ।