सहिद माधव सारु मगरको घरबाट नारायण प्रसाद खनालको चुनावी घरदैलो अभियान सुरु

 

१४ पुष,अर्घाखाँची । अर्घाखाँची जिल्लाबाट प्रतिनिधिसभा सदस्य निर्वाचनका लागि स्वतन्त्र उम्मेदवारी घोषणा गर्नुभएका नारायण प्रसाद खनालले आफ्नो चुनावी घरदैलो अभियानको सुरुवात सहिद माधव सारु मगरको घरबाट गर्नुभएको छ ।

भाद्र २३ गते ज्यान गुमाएका सहिद माधव सारु मगरको भुमिकास्थान नगरपालिका–धारापानीस्थित घरमा पुगेर खनालले सहिदकी आमासँग भेटघाट गर्नुभएको हो । भेटका क्रममा उहाँले सहिद माधव सारु मगरप्रति श्रद्धाञ्जली अर्पण गर्दै शोकसन्तप्त परिवारप्रति गहिरो सम्मान व्यक्त गर्नुभयो ।

उम्मेदवार खनालले माधव सारु मगर अर्घाखाँचीको मात्र होइन, सिंगो देश र यो धर्तीमा परिवर्तनको सपना बोकेर आफ्नो अमूल्य जीवन बलिदान दिने वीर सपूत भएको बताउनुभयो । उहाँले सहिद माधवको सपना, संघर्ष र बलिदानलाई सदैव सम्मान गर्दै आत्मशान्तिका लागि प्रतिबद्ध भएर अघि बढ्ने अठोट व्यक्त गर्नुभयो ।

अन्याय, भ्रष्टाचार र बेथितिविरुद्धको आफ्नो राजनीतिक यात्रा सहिदहरूको बलिदानबाट प्रेरित रहेको उल्लेख गर्दै खनालले जनताको आवाज बनेर सत्य र न्यायको पक्षमा उभिने प्रतिबद्धता दोहोर्याउनुभयो । सहिदको बलिदान खेर जान नदिने दृढ संकल्पसहित आफू यो चुनावी यात्रामा अघि बढेको उहाँको भनाइ छ ।

सहिदको घरबाट अभियान सुरु गर्नुले आफ्नो उम्मेदवारी मूल्य, सिद्धान्त र त्यागमा आधारित भएको सन्देश दिएको खनालले बताउनुभएको छ ।