काठमाडौँको लाजिम्पाटमा नियो स्टोरको उद्घाटन सम्पन्न

 

काठमाडौं । नियोटेरिक नेपाल स्टोरले आइतबार काठमाडौँको लाजिम्पाटमा आफ्नो अहिलेसम्मकै सबैभन्दा ठूलो र प्रिमियम आउटलेटको औपचारिक रूपमा संचालनमा ल्याएको छ । नियो स्टोरको यो उद्घाटनले नेपालमा विकसित हुँदै गएको प्रविधिको खुद्रा बजारमा एउटा महत्वपूर्ण उपलब्धिलाई जनाउँने कम्पनीको विश्वास रहेको छ ।

लाजिम्पाटस्थित यो नयाँ नियो स्टोरलाई प्रविधिको खुद्रा बिक्रीलाई अनुभव–केन्द्रित बनाउने उद्देश्यले डिजाइन गरिएको छ । फराकिलो संरचना, आधुनिक इन्टेरियर डिजाइन र सफा तथा प्रिमियम सौन्दर्यसहितको यो स्टोरले परम्परागत बिक्री प्रणालीभन्दा अगाडि बढ्दै ग्राहकलाई सहज वातावरणमा प्रविधि अवलोकन र प्रयोग गर्न सक्ने अवसर प्रदान गर्ने लक्ष्य राखेको छ ।

यस आउटलेटको प्रमुख विशेषतामध्ये एक भनेको गेमिङ र डिजिटल मनोरञ्जनमा दिइएको विशेष ध्यान दिइनु हो । स्टोरमा नवीनतम कन्सोलसहितका इन्टरएक्टिभ गेमिङ स्टेशनहरू राखिएका छन् भने ठूलो स्क्रिन हेर्ने सुविधा र प्रत्यक्ष गेमिङ अनुभवका लागि छुट्टै मनोरञ्जन क्षेत्र पनि छ । आगन्तुकहरूले लाइभ डेमो, कन्सोल–आधारित गतिविधि तथा वाक–इन गेमिङ अनुभव लिन सक्छन्, जुन अवधारणा नेपालको खुद्रा क्षेत्रमा अझै नयाँ मानिन्छ ।

कम्पनीका अनुसार यो स्टोर गेमर, कन्टेन्ट क्रिएटर र प्रविधि प्रेमीलाई ध्यानमा राखेर डिजाइन गरिएको हो, जहाँ प्रविधि किन्ने मात्र होइन, प्रत्यक्ष अनुभव गर्न सकिन्छ ।

भव्य उद्घाटनको अवसरमा नियो स्टोरले ASUS, Logitech, Belkin, Fantech, Baseus, HiFuture, Black Shark, Imperion, Miccell लगायतका अन्तर्राष्ट्रिय तथा नेपाली प्रविधि ब्रान्डहरूसँग सहकार्य गर्दै सीमित अवधिका अफर र उपहारहरू सार्वजनिक गरेको थियो । उद्घाटन दिन विशेष छुट, बन्डल प्रोडक्ट र छानिएका उत्पादन वर्ग—विशेषगरी ल्यापटप, डेस्कटप र एक्सेसोरीहरूमा—प्रारम्भिक ग्राहकका लागि निःशुल्क सामग्री प्रदान गरिएको थियो । कम्पनीका अनुसार केही अफरहरू उद्घाटनपछि पनि सीमित समयसम्म जारी रहनेछन् ।

कार्यक्रमका क्रममा नियो स्टोरले आफ्नो आगामी इन–हाउस ब्रान्ड ‘neOne’ को झलक पनि प्रस्तुत गरेको थियो, जुन हाल विकासको चरणमा छ । यो ब्रान्डअन्तर्गत तीनवटा इयरबड र एउटा हेडफोन गरी चार अडियो उत्पादन छिट्टै नियो स्टोरका आउटलेट तथा अनलाइन प्लेटफर्ममार्फत उपलब्ध हुने अपेक्षा गरिएको छ । प्रारम्भिक चरणमा आकर्षक मूल्य निर्धारण गरिने कम्पनीले जनाएको छ।लाजिम्पाट आउटलेटसँगै नियो स्टोरले देशमा प्रविधि कसरी प्रस्तुत, पहुँचयोग्य र अनुभव गरिन्छ भन्ने परिभाषा बदल्ने लक्ष्यसहित अगाडि बढेको जनाएको छ।