दशैं–तिहार लक्षित बजार अनुगमन तिव्र पारिने, अखाद्य वस्तु बेच्ने व्यापारी कारवाहीमा पर्ने

 

१८ भदौ, काठमाडौं । दशैं र तिहार जस्ता ठूला चाडपर्व नजिकिँदै गर्दा खाद्य प्राविधि तथा गुण नियन्त्रण विभागले बजार अनुगमनलाई थप कडाइ गर्ने भएको छ । विभागका प्रवक्ता मोहनकृष्ण महर्जनले बजारमा अखाद्य र म्याद गुज्रिएका सामग्री बिक्री गर्ने व्यापारीलाई कानुन बमोजिम कडा कारवाही गरिने चेतावनी दिनु भएको छ ।

“अहिले पनि हाम्रो टिम बजारमै खटिएको छ । अब भने अझ ठूलो टोली पठाएर अनुगमनलाई तिव्रता दिनेछौं,” उहाँले खबरब्रेकिंग डटकम सँगको छोटो कुराकानीमा भन्नुभयो । महर्जनका अनुसार मेला–पर्वको समयमा व्यापारीहरूले मनपरी मूल्यवृद्धि गर्ने, अखाद्य तथा म्याद गुज्रिएका वस्तु बिक्री गर्ने प्रवृत्ति बढ्ने भएकाले यसपटक विभाग थप सतर्क रहनेछ ।

प्रवक्ता महर्जनले सरोकारवाला सबै निकायसँग समन्वय गरेर चाडपर्व लक्षित बजार अनुगमनलाई प्रभावकारी बनाउन पहल भइरहेको जानकारी दिनुभयो । “व्यापारीहरूले पर्वको नाममा उपभोक्तामाथि नाजायज नाफा कमाउने प्रयास गर्छन्, तर त्यस्ता व्यापारीलाई यसपटक सजिलै छोडिँदैन,” उहाँले चेतावनी दिनुभयो ।

उहाँका अनुसार उपभोक्ताको स्वास्थ्य र अधिकारलाई ध्यानमा राख्दै बजारमा गुणस्तरीय र सुरक्षित खाद्य वस्तु उपलब्ध गराउन विभागले निरन्तर अनुगमनलाई प्राथमिकता दिएको छ ।