नाडा अटोमोवाइल्स एशोसिएशन अफ नेपालद्वारा बजेटप्रति स्वागत– अटोमोवाइल व्यवसायमैत्री नीति ल्याएकोमा नेपाल सरकारप्रति आभार

 

१७ जेठ , काठमाडौँ। आर्थिक वर्ष २०८२/०८३ का लागि नेपाल सरकारले संघीय संसद्मा प्रस्तुत गरेको बजेट वक्तव्यप्रति नाडा अटोमोवाइल्स एशोसिएशन अफ नेपाल (नाडा) ले सकारात्मक प्रतिक्रिया व्यक्त गरेको छ। लामो समयदेखि अटोमोवाइल व्यवसायमा संलग्न उद्योगी तथा व्यवसायीहरूको आवाजलाई सम्बोधन गर्दै यो बजेट व्यवसायमैत्री बनेको भन्दै नाडाले खुलेर स्वागत गरेको हो।

नाडाले अटोमोवाइल व्यवसायलाई गतिशील र प्रतिस्पर्धात्मक बनाउने उद्देश्यले विगतमा निरन्तर रूपमा सरकारका सम्बन्धित मन्त्रालय र विभागहरूमा आफ्नो तर्फबाट विभिन्न नीतिगत सुझावहरू र सल्लाहहरू प्रस्तुत गर्दै आएको थियो। यद्यपि यसपटक पनि सबै सुझावहरू समावेश नभएको स्वीकार्दै नाडाले समेटिएका विषयहरू पर्याप्त सकारात्मक रहेको निष्कर्ष निकालेको छ।

बर्षौंदेखि उठाउँदै आएको मागहरूमध्ये धेरैलाई सम्बोधन गरेको यसपटकको बजेटले व्यवसाय प्रवर्द्धनमा महत्वपूर्ण सहयोग पुग्ने विश्वास नाडाले व्यक्त गरेको छ। विशेषतः कर संरचना स्थायित्व, विद्युतीय सवारी साधनको प्रोत्साहन, चार्जिङ मेसिन उत्पादनका लागि भन्सार सहुलियत र सवारी फिटनेस केन्द्रको स्थापना सम्बन्धी घोषणाहरू नाडाको नजरमा व्यवसायमैत्री निर्णयका रूपमा रहेको छ।

नाडाले विश्वास व्यक्त गरेको छ कि बजेटमार्फत उद्यमी तथा व्यवसायीहरूको मनोबल उच्च बनाउनुका साथै समग्र मुलुकको अर्थतन्त्रलाई समेत गतिशील बनाउने आधार तयार हुनेछ। हाल अटोमोवाइल उद्योग मात्र होइन, त्यससँग प्रत्यक्ष–परोक्ष रूपमा जोडिएका क्षेत्रहरू (सर्भिस, पार्टस्, बीमा, फाइनान्स आदि) मा समेत रोजगारी सृजना र लगानी विस्तार हुने वातावरण बिस्तारै निर्माण हुँदै जानेछ।

आगामी मौद्रिक नीतिले पनि यस्तै व्यवसायमैत्री तथा लगानी अनुकूल व्यवस्था ल्याउने आशा व्यक्त गर्दै नाडाले बजेटमार्फत आफूहरूको आवाजलाई सम्बोधन गरिदिएकोमा नेपाल सरकारप्रति हार्दिक आभार र धन्यवाद प्रकट गरेको छ।

यसरी, नाडाले प्रस्तुत बजेटलाई अटोमोवाइल क्षेत्रको दीर्घकालीन विकासतर्फ अग्रसर गराउने एउटा सकारात्मक संकेतका रूपमा लिएको छ। नीतिगत स्थायित्व, नवप्रवर्तन, र दिगो उन्नतिका दिशामा सरकार र निजी क्षेत्रको सहकार्य अझ सुदृढ हुँदै जानुपर्नेमा नाडाले जोड दिएको छ।