निजामती सेवा विधेयकविरुद्ध आन्दोलनमा कर्मचारी, पारदर्शी नीति र सुविधा सुनिश्चितताको माग

 

८ जेठ, काठमाडौँ ।प्रस्तावित निजामती सेवा विधेयकले निजामती कर्मचारीहरूको असन्तुष्टि चुलिएको छ। वृत्ति विकास, सेवा-सुविधा र सरुवा/बढुवा प्रक्रियामा विधेयकले पारदर्शिता र स्पष्टता नल्याएको भन्दै कर्मचारीहरूले आन्दोलित हुने निर्णय गरेका छन्।

बुधवारदेखि संघीय मामिला तथा सामान्य प्रशासन मन्त्रालयअगाडि कर्मचारीहरूले धर्ना सुरु गरेका छन्। आन्दोलनमा उत्रिएका उनीहरूले विधेयकमा समेटिएको कतिपय प्रावधान कर्मचारी हितविपरीत रहेको भन्दै तत्काल पुनरावलोकनको माग गरेका छन्।

निजामती कर्मचारी युनियनका प्रतिनिधिहरूका अनुसार विधेयकले कर्मचारीहरूको वृत्ति विकासको स्पष्ट खाका नखिचेको, सरुवा र बढुवाको प्रक्रिया अन्योलपूर्ण बनाएको तथा सेवा–सुविधा कटौतीतर्फ उन्मुख भएको देखिएको छ। यिनै विषयले कर्मचारीहरूको मनोबल कमजोर बनाउने भन्दै उनीहरूले विरोधको स्वर बुलन्द पारेका हुन्।

“हामी कर्मचारीमैत्री नीति र पारदर्शी प्रणालीको पक्षमा छौं,” एक युनियन नेताले बताए, “तर यो विधेयकले त्यसको ठीक उल्टो असर पार्ने भएकाले हामीलाई सडकमा उत्रिनु परेको हो।”

निजामती सेवा कर्मचारीहरूले सरकारसँग संवादको लागि आग्रह गरेपनि, सरकारले आवाज नसुने आन्दोलन अझ तीव्र बनाउने चेतावनी समेत दिएका छन्। अबको बाटो सरकारले उनीहरूको मागलाई कति गम्भीरतापूर्वक लिन्छ भन्नेमा निर्भर हुनेछ।