फेकन उपाध्यक्ष पदमा किशोर दुलालको उम्मेदवारी घोषणा

 

२३ वैशाख, काठमाडौं । स्वतन्त्र शैक्षिक परामर्श संघ नेपाल (फेकन) को शनिबार हुने महत्वपूर्ण निर्वाचनका सन्दर्भमा उपाध्यक्ष पदका लागि किशोर दुलाल (खगेन्द्र) ले आफ्नो उम्मेदवारीको औपचारिक घोषणा गरेका छन्।

दुलालले लामो समयदेखि संस्थामा सक्रिय रूपमा योगदान दिँदै आएका छन् र अहिलेको जटिल परिस्थिति र संगठनभित्रको आवश्यक नेतृत्वको खाँचोलाई महसुस गर्दै आफ्नो उम्मेदवारी अघि सारेका हुन्। सामाजिक सञ्जालमार्फत एक मार्मिक अपिल सार्वजनिक गर्दै उनले फेकनलाई थप सशक्त, समावेशी र अन्तर्राष्ट्रिय मञ्चमा चिनिन योग्य संस्था बनाउने अठोटका साथ उम्मेदवार बनेको स्पष्ट पारेका छन्।

उनले फेकनको विगतको गौरवपूर्ण इतिहासप्रति सम्मान व्यक्त गर्दै हालको संवेदनशील अवस्थालाई सहज र सन्तुलित मार्गमा लैजान एक जिम्मेवार नेतृत्व आवश्यक रहेको औंल्याएका छन्। दुलालका अनुसार संस्थाले विगतमा उत्कृष्ट सफलता हासिल गरे पनि त्यस स्थायित्वलाई कायम राख्न अब अझ बढी समर्पण, नयाँ दृष्टिकोण, र स्पष्ट कार्ययोजना अपरिहार्य छ। यही जिम्मेवारीको भावना बोकेर उनी नेतृत्वको दोस्रो तह अर्थात् उपाध्यक्षको भूमिकाका लागि प्रस्तुत भएका हुन्।

फेकनमा एक कार्यकाल कार्यसमिति सदस्यको हैसियतमा काम गरिसकेका दुलालले त्यस अवधिमा आफूले कुनै पनि नकारात्मक वा संस्थाको हितविपरीत कदम नचालेको दाबी गरेका छन्। बरु, संस्थाको मजबुत आधार निर्माणमा उल्लेखनीय भूमिका निर्वाह गरेको उनले स्मरण गराएका छन्। सदस्य विस्तार अभियानका क्रममा आफ्नो सक्रियताले संस्थालाई संरचनात्मक रूपमा बलियो बनाएको अनुभव पनि उनले साझा गरेका छन्।

उनले आफूलाई स्पष्ट नीति, पारदर्शी सोच र उत्तरदायित्वबोधले भरिएको फेकन सदस्यको रूपमा चित्रण गर्दै भनेका छन्, “म नेतृत्वलाई अधिकार होइन, जिम्मेवारी ठान्छु। नेतृत्व पदमा पुग्नु मेरो अन्तिम गन्तव्य होइन, तर जिम्मेवार संस्थागत भविष्य निर्माणका लागि आवश्यक साधन हो।”

राजनीति शास्त्र र समाजशास्त्रसँगको घनिष्ठ सम्बन्धको कारण, उनी लोकतान्त्रिक मूल्य र प्रक्रियालाई आत्मसात गर्न सधैं तत्पर रहेको बताउँछन्। फेकनको नेतृत्वमा पुगेर व्यक्तिगत लाभ भन्दा संस्था र सदस्यको सामूहिक हितका पक्षमा निर्णय लिन आफू सक्षम रहेको उनको धारणा छ।

दुलालले कुनै झूटा प्रतिवद्धता या अतिरञ्जित सपनाको पछि नलागी, यथार्थवादी दृष्टिकोण र इमान्दार प्रयासमार्फत संस्थालाई नयाँ गन्तव्यमा पुर्‍याउने दृढ निश्चय दोहोर्‍याएका छन्। “फेकन छ भने म पनि छु,” भन्दै उनले फेकनप्रतिको आफ्नो स्थायी प्रतिबद्धता जनाएका छन्। पदको प्राप्ति भन्दा बढी संस्थासँगको आत्मिक सम्बन्धलाई उनले प्राथमिकतामा राखेका छन्।

आफ्नो उम्मेदवारीलाई यथार्थपरक, आवश्यकता–आधारित र परिस्थितिसापेक्ष कदमको रूपमा व्याख्या गर्दै दुलालले सम्पूर्ण फेकन सदस्यहरूलाई समर्थन, सहभागिता र विश्वासका लागि आह्वान गरेका छन्। “म जित्न मात्र होइन, सिक्न पनि प्रतिस्पर्धामा उत्रिएको छु,” उनले भावुक शब्दहरूमा भनेका छन्।

उनको भनाइमा अहिलेको प्रमुख आवश्यकता भनेको संस्थाप्रतिको गर्व र आत्मगौरवको भावना हो। यस्तो ‘गर्विलो फेकन’ निर्माण हाम्रो पुस्तामै सम्भव छ भन्ने विश्वाससहित उनी नेतृत्वका लागि अघि सरेका छन्।

योजना, विचार र कार्यशैलीमा परिपक्वता देखाउँदै किशोर दुलालले नेतृत्वको नयाँ पुस्ता तयार पार्ने दिशामा आफूलाई एक सक्षम उम्मेदवारको रूपमा प्रस्तुत गरेका छन्। निर्वाचनको नतिजा जे भए पनि, संस्थाको समुन्नत भविष्य निर्माणमा निरन्तर सहभागी रहने उनको प्रतिबद्धता स्पष्ट देखिन्छ।