नेपाल राष्ट्रिय व्यवसायी महासंघको तेस्रो राष्ट्रिय अधिवेशन पुष २० गते काठमाडौंमा हुने

काठमाडौं । नेपाल राष्ट्रिय व्यवसायी महासंघले  व्यवसाय दर्ता एकद्वार प्रणालीमा  हुने व्यवस्था गर्नुपर्ने , स्थायी लेखा नम्बर (प्यान) कारोवारको दायरालाई ५० लाखबाट बढाएर २ करोड बनाउउनुपर्ने लगायतका माग सरकार समक्ष राखेको  छ ।

महासंघको सातौं साधारण सभा तथा तेश्रो राष्ट्रिय अधिवेशनको बारेमा जानकारी दिन काठमाडौंमा  पुष १४ गते आइतबार  आयोजना गरेको पत्रकार सम्मेलनमार्फत यस्तो माग गरेको हो ।

उक्त पत्रकार सम्मेलनमा महासंघका अध्यक्ष कुमार कार्कीले महासंघको तेस्रो राष्ट्रिय अधिवेशन यही  पौष २० गते शनिबार काठमाडौंमा गरिने जानकारी दिए । पत्रकार सम्मेलनमा बोल्दै  अध्यक्ष  कार्कीले २०७४ सालमा स्थापना भएको महासंघले तेस्रो राष्ट्रिय अधिवेशनमार्फत नयाँ नेतृत्व चयन गर्ने बताए । उनले साना तथा मझौला व्यवसायीहरुको समस्या समाधानको लागि राज्य स्तरसम्म पुर्‍याउने काम महासंघले गर्दै आएको बताउँदै महासंघको तेश्रो राष्ट्रिय अधिवेशनको समुद्घाटन पूर्वप्रधानमन्त्री पुष्पकमल दाहालले गर्ने तय भएको बताए ।

अध्यक्ष कार्कीले अधिवेशनमार्फत सरकारसँग महासंघले नेपाल भारत खुला सीमामा हुने चोरी पैठारी तत्काल रोक्न माग गर्ने बताउँदै व्यवसाय दर्ता एकद्वार प्रणालीमा गर्न सरकारसँग माग गरे ।

महासंघका संस्थापक अध्यक्ष नरेश कटुवालले स्थायी लेखा नम्बर (प्यान) कारोबारको दायरालाई ५० लाख बाट बढाएर २ करोड बनाउन सरकारसँग माग गरे । उनले प्यानमा ५० लाखसम्म मात्रै कारोबार गर्न पाउने व्यवस्था रहेको भन्दै त्यसलाई पुन:विचार गरी सरकारले २ करोड बनाउनु गर्नेमा जोड दिए ।

उनले शहरी क्षेत्रमा उद्योग व्यापार व्यवसाय गर्ने व्यवसायीहरुको लागि राज्यले वैज्ञानिक घरभाडा लागू गर्नुपर्ने बताउँदै महासंघले बारम्बार भन्दै आए पनि सरकारले सुनुवाई गर्न नसकेको गुनासो गरे । उनले खाता विवरणहरुको आधारमा कर कार्यालयबाट कर चुक्ता प्रमाण पत्र प्रदान गरे पश्चात पुनरावलोकन नगर्ने व्यवस्था लागू गर्नुपर्ने बताए । उनले सरकारसँग साना उद्योगी व्यवसायीहरुको पनि सहज पहुंच बनाउन माग गरे ।

महासंघले  आयातमा कायम  हालको भन्सार दरवन्दी घटाउनु पर्ने जनाएको छ । त्यस्तै, घर  बहाल कर ५ प्रतिशत कायम गरिनुपर्ने लगायतका माग समेत महासंघले राखेको छ ।