भारतीय पर्यटकलाई सीमामा सहजता प्रदान गर्नसके पर्यटन क्षेत्रमा राम्रो गर्न सकिन्छः अध्यक्ष ढकाल

१६ भदौं,काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले देशमा रेमिट्यान्सहरु बढेको र विदेशी मुद्रा सञ्चिती पनि बढेको बताउनु भएको छ । आईतवार काठमाडौंमा नेपाल आर्थिक पत्रकार समाज (सेजन) को २६ औं वार्षिक साधारण सभामा बोल्दै ढकालले यस्तो बताउनु भएको हो ।

उहाँले मौद्रिक नीतिपछि शेयर बजार बढिरहेको र घर–जग्गाको कारोबार बढेको बताउँदै अर्थतन्त्र सकारात्मक हिसावले अघि बढिरहेको बताउनु भयो । उहाँले सबै मिलेर यसलाई दिगो बनाउनुपर्ने बताउनु भयो ।अख्तियार दुरुपयोग अनुसन्धान आयोग र राष्ट्रिय शतर्कता केन्द्रले अनुगमन गर्ने गरी सरकार अघि बढे अर्थतन्त्र चलायमान बन्न नसक्ने उहाँको भनाई छ ।

निजी क्षेत्रको अनुगमन र निरीक्षण अख्तियार र शतर्कता केन्द्रले गर्दा अर्थतन्त्र चलायमान बन्न नसक्ने उहाँले ठोकुवा गर्नु भयो । त्यस्तो स्थिती बने निजी क्षेत्रले रोजगारीको क्षेत्र र उत्पादन वृद्धि गर्न नसक्ने स्थिति बन्ने उहाँले बताउनु भयो ।

उहाँले सीमाको कडाई गर्नुपर्ने कुरामा सरकारले बढी प्राथमिकता दिनुपर्ने बताउनु भयो । भारतीय पर्यटकलाई सीमामा सहजता प्रदान गर्नसके पर्यटन क्षेत्रमा पनि राम्रो गर्न सकिने उहाँको भनाई छ ।