डा.अजय क्रान्ति शाक्यको पुस्तक ‘बुद्धका मौलिक दर्शन’ को प्रधानमन्त्री ओलीले गरे लोकार्पण

कार्यक्रममा बुद्ध दर्शनको एउटा पाटो दान संस्कृतिलाई ओलीले आफ्नै जीवनसँग तुलना समेत गरेका थिए । दान ठूलो कुरा भएको भन्दै प्रधानमन्त्री ओलीले आफूले मिर्गौला दान नपाएको भए अहिले १७औं पुन्यतिथि हुने बताए । बौद्ध दर्शनमा दान पारमिताको ठुलो महत्त्व रहेको प्रधानमन्त्रीले उल्लेख गरे।

पुस्तकका लेखक शाक्यले आफ्नो यो पुस्तकमा  बौद्ध धर्म–दर्शन अनुसार जीवन भनेको के–हो ? हामी किन जन्मिन्छौं ? किन मर्छौ ? मानिस भनेको के–हो ? यो भवचक्र किन चलिरहेको छ ?  सबै प्राणीहरु भनेका के हुन ? यो ब्रम्हाण्ड भनेको के–हो ? स्वर्ग नर्क आदि लोक भनेको के–हो ? पूर्व जन्म भनेको के हो ? कर्म भनेको के हो ? अनित्य, दुःख र अनात्म भनेका के–हुन् ? कर्म विपाक हुन्छ कि हुँदैन ? लोभ, मोह, तृष्णा आदि भनेका के हुन् ? चित्त चेतना भनेका के हुन ? जस्ता यावत प्रश्नहरु बौद्ध दर्शनका पाठकहरु समक्ष स्पष्ट पार्न पुस्तक सहयोगी बन्ने अपेक्षा गरेको बताए ।

‘यो पुस्तक ‘बुद्धका मौलिक दर्शन’ मा बुद्धका आधारभुत शिक्षाहरुका बारे उल्लेख गरिएको छ,’लेखक शाक्यले भने,’त्यसैले बुद्धका आधारभूत शिक्षाका बारे जानकारी लिन चाहनु हुने पाठकहरुका लागि ‘बुद्धका मौलिक दर्शन’ नामक यो पुस्तक फलदायी हुने अपेक्षा गरेको छु ।’

शाक्यको कृतिबारे व्याख्या  गर्दै भाषा आयोगका सदस्य सुरेश किरण मानन्धरले मूलतः बुद्ध धर्ममा अभ्यास गरिने ध्यानको बारेमा  पुस्तकमा  भएको उल्लेख गरे ।

पुस्तकको पहिलो भागमा ध्यान अभ्यास गर्नु पूर्व मनन् गर्नुपर्ने विभिन्न विषयहरूका बारेमा चर्चा गरिएको छ ।