जनअपेक्षा अनुसार सरकारले काम गर्ने मन्त्री यादवको दाबी

काठमाडौं– उद्योग वाणिज्य तथा आपूर्तिमन्त्री मातृकाप्रसाद यादवले जनताको अपेक्षा अनुसार आगामी दिनमा काम गरेर देखाउने बताएका छन् । राजधानीमा खिचापोखरी न्यूरोड व्यापार संघको ‘छैटाँै अधिवेशन तथा ११ औँ वार्षिक साधारणसभा’ कार्यक्रमलाई सम्बोधन गर्दै मन्त्री यादवले जनताको अपेक्षामा सरकार गम्भीर भएर लागेको बताए ।

काठमाडौँ महानगरपालिकाका प्रमुख विद्यासुन्दर शाक्यले न्यूरोड ऐतिहासिक व्यापारिकस्थल भएकाले यस क्षेत्रको विकासका लागि महानगरपालिकाले योजना बनाएर अगाडि बढ्न लागेको बताए । फुटपाथ मुक्त शहर निर्माण गर्न महानगरपालिका लागेको उनको भनाइ थियो । महानगरपालिकाले न्यूरोड र दरबारमार्ग क्षेत्रमा ‘स्मार्ट पार्किङ’को रुपमा विकास गर्न बोलपत्र आह्वान गरिसकेको प्रमुख शाक्यले बताए ।

नेपाल चेम्बर अफ कमर्शका वरिष्ठ उपाध्यक्ष राजेन्द्र मल्लले मुलुकको व्यापार घाटा कम गर्न सरकारले आयातलाई कम गरी निर्यातलाई बढावा दिने वातावरण निर्माणमा लाग्नुपर्ने बताए ।