यस कारण रिसिए मन्त्रीहरु उद्योगी संग

 

उद्योग व्यवसायीहरुले आफनो हितको लागी बिभिन्न मागहरु अगाडी सारिरहेको बेला मन्त्रीहरुले त्यसको जवाफ फर्काएका छन् । उद्योग, वाणिज्य तथा आपूर्तिमन्त्री मात्रिकाप्रसाद यादवले चिनी उद्योगीहरुलाई ‘केटाकेटी’ को संज्ञा दिएका छन् । अर्थमन्त्री डा. युवराज खतिवडाले स्वदेशी उद्योग भन्दैमा सरकारले सधैं संरक्षण गर्न नसक्ने बताएका छन् । त्यसैगरी श्रममन्त्री गोकर्ण विष्टले चिया उद्योगीलाई थर्काउँदै भने– ‘गाडीका लागि डिजेल पनि माग्नुस् न, त्योचाहिँ छुट्यो !’ चिनी, कफी तथा चिया उद्योगमा देखिएका समस्यामाथि छलफल गर्न प्रतिनिधिसभाअन्तरगत उद्योग तथा वाणिज्य र श्रम तथा उपभोक्ता हित समितिले उद्योगी व्यवसायी र तीन मन्त्रीहरुलाई सिंहदरबारमा बोलाएको थियो । बैठकमा छलफलको मुख्य विषय चिनी, चिया र कफीमा नेपाललाई कसरी आत्मनिर्भर गराउन सकिन्छ भन्ने थियो ।

यसमाथि छलफल गर्न संसदीय समितिका तर्फबाट सम्बन्धित मन्त्रालय अर्थ, उद्योग, वाणिज्य तथा आपूर्ति, श्रम तथा रोजगार र कृषि विकास मन्त्रीहरुलाई बोलाइएको थियो । समितिको बैठकमा कृषि मन्त्री चक्रपाणि खनाल नआएका कारण मन्त्रालयका सचिव युवकध्वज जीसीले नै मन्त्रालयको प्रतिनिधित्व गरे । बाँकी तीनवटै मन्त्रालयका मन्त्रीहरु स्वयं बैठकमा आएका थिए । बैठकको शुरुमा उद्योग समितिका सभापति विमलप्रसाद श्रीवास्तवले आफ्ना सुझावहरु राख्न चिनी उद्योग संघ, कफी व्यवसायी महासंघ र चिया उत्पादक संघका प्रतिनिधिलाई क्रमशः समय दिए । उद्योगीहरुले आफ्ना समस्या राखिसकेपछि तीनैजना मन्त्रीहरु पालैपालो कडा रुपमा प्रस्तुत भए ।श्रममन्त्री विष्टले चिया बगानमा सरकारबाट आवास सुविधा माग गर्ने उद्योगीले मजदुरलाई बिर्सिएको टिप्पणी गरे ।

‘ऐनको व्यवस्था र सरकारले ल्याएको कानुन मान्दैनौं भन्ने तागत कसरी आयो ?’, बिष्टले भने,’ सरकारको प्रतिनिधिको हैसियतले म भन्छु– सामाजिक सुरक्षा कार्यक्रम चिया उद्योगमा पनि लागू हुन्छ ।’ योगदानमा आधारित समाजिक सुरक्षा ऐन र श्रम ऐन आफू एक्लैले नबनाएको भन्दै कानुन मान्दिनँ भन्न कसैले पनि नपाउने मन्त्री विष्टले बताए । उनले सरकारले ल्याएको योजना जसरी पनि लागू हुने बताए ।

कफी ओझेलमा र्पयो, चिनी र चियामा निश्कर्ष निस्किएन बुधबार बिहान ११ बजेदेखि अपरान्ह ४ बजेसम्म चलेको बैठकको निश्कर्ष भने केही पनि निस्किएन । लामो बहस र छलफलमात्रै भयो । बेलुका ४ बज्नै लागेपछि कर्मचारीहरुको आन्दोलन कारण समितिको बैठक अन्त्य भएको घोषणा गरियो । चिनी र चियाको विषयमा लामै बहस भए पनि कफीको विषयमा धेरै छलफल भएन । कफी व्यवसायका विषयमा राष्ट्रिय कफी महासंघका संस्थापक अध्यक्ष ढकेश्वर घिमिरेले कफीका लागि आवश्यक विषयहरु र सरकारले गर्नुपर्ने भन्दै आफ्नो प्रस्तुती राखेका थिए । तर, अर्थमन्त्री खतिवडा र उद्योगमन्त्री यादव चिनीतिर अनि श्रममन्त्री चियातिर केन्द्रित हुँदा कफीको छलफल ओझेलमा प¥यो ।

सबैले आ–आफ्ना तर्क प्रस्तुत गरे पनि निश्कर्ष भने बुधबारको बैठकले केही पनि निकाल्न सकेन । बैठक केवल भनाभनमै सीमित भयो । छलफल अझै लम्बिने भए पनि कर्मचारी आन्दोलनको प्रभाव बैठकमा देखियो । सिंहदरबारभित्रै कर्मचारीहरु यतिबेला आन्दोलनमा छन् । कर्मचारीले आन्दोलनका लागि भन्दै ४ बजे नै कार्यालय छाड्ने गरेका छन् । ४ बजे संसद सचिवालयका कर्मचारी हिँड्ने भएपछि समिति सभापति विमलप्रसाद श्रीवास्तवले पुनः आवश्यक परे छलफल गर्ने भन्दै बैठक समापन भएको घोषणा गरे ।चिनी उद्योग र उखु किसानका समस्यामा भने अर्थ, उद्योग र कृषि मन्त्रालयका अधिकारीहरुले बिहीबार छुट्टै छलफल गर्ने कृषि सचिव युवकध्वज जीसीले जानकारी दिएका छन् ।