भारत लगिँदै गरेका बालबालिका कञ्चनपुर प्रहरीको नियन्त्रणमा, नियन्त्रणमा लिइएकाहरुलाई माइती नेपालको आश्रयमा

नेपालमा बालबालिका बर्षनी सयौको संख्यामा हराउने गर्छन । बालबालिका हरुलाई बिभिन्न प्रलोभन देखाएर तस्करहरुले भारत तर्फ लग्ने गरेको समाचार पनि बारम्बार आउने गर्छन ।यस्तै भारततर्फ लगिँदै गरेका १८ बालबालिका २ व्यक्तिलाई कञ्चनपुर प्रहरीले नियन्त्रणमा लिएको समाचार प्राप्त भएको छ । कञ्चनपुरको पश्चिमी नाका गड्डा चौकीबाट बिहीबार बेलुकी १२ बालक, ६ बालिकासहित २० जनालाई नियन्त्रणमा लिइएको कञ्चनपुर प्रहरीले जनाएको छ । नेपाल प्रहरीका अनुसार भारतीय सीमा सुरक्षा बल (एसएसबी) को सहयोगमा नियन्त्रणमा लिइएको हो । बालबालिकाहरु अछामको ढकारी गाउँपालिका–७ का रहेको खुलेको छ ।
पक्राउ परेका २ व्यक्ति पनि सोही गाउँपालिका निवासी ५३ वर्षीय रामबहादुर बुढा र ४८ वर्षीय रतन विक रहेको प्रहरीले जनाएको छ ।नियन्त्रणमा लिइएकाहरुलाई माइती नेपालको आश्रयमा राखिएको छ । भारततर्फ जाने क्रममा बालबालिकासँगै रहेका बालवालिकाहरु भारतमा रहेका आफन्तहरुको सल्लाह अनुसार नै काम गर्न जान लागेको प्रारम्भिक रुपमा बुझिएको कञ्चनपुर प्रहरीले जानकारी दिएको छ ।