टन्डुकारद्वारा तिहार, म्हः पूजा, नेपाल संवत् ११४६ तथा छठ पर्वको अवसरमा शुभकामना आदान–प्रदान कार्यक्रम सम्पन्न

 

५ कार्तिक, काठमाडौं  । काठमाडौं महानगरपालिका–११ का वडा अध्यक्ष हिरा लाल टन्डुकारले नेपालीहरूको महान चाड तिहार, म्हः पूजा, नेपाल संवत् ११४६ तथा छठ पर्वको उपलक्ष्यमा बबरमहलस्थित कार्की ब्याङ्क्वेटमा भव्य शुभकामना आदान–प्रदान कार्यक्रम आयोजना गर्नुभएको छ ।

कार्यक्रममा पूर्व उपप्रधानमन्त्री तथा नेपाली कांग्रेसका वरिष्ठ नेता प्रकाशमान सिंह,  स्थानीय निकायका जनप्रतिनिधि, बुद्धिजीवी, समाजसेवी, कलाकार, साहित्यकार तथा बिभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो ।

वडा अध्यक्ष टन्डुकारले २०३६ सालदेखि निरन्तर रूपमा आफ्नो व्यक्तिगत खर्चमा यो शुभकामना आदान–प्रदान कार्यक्रम आयोजना गर्दै आउनु भएको जानकारी दिनुभयो । उहाँका अनुसार यो कार्यक्रमले समुदायबीच आपसी सद्भाव, सहकार्य र सौहार्दका सम्बन्धलाई बलियो बनाउन महत्वपूर्ण योगदान दिँदै आएको छ ।

कार्यक्रममा बोल्दै अध्यक्ष टन्डुकारले नेपाल संवत् नेपाली पहिचान, सभ्यता र मौलिक संस्कृतिको प्रतीक भएको उल्लेख गर्दै त्यसको संरक्षण र प्रवर्द्धनमा सबैले आफ्नो जिम्मेवारी वहन गर्नुपर्नेमा जोड दिनुभयो । उहाँले भन्नुभयो, “हाम्रो परम्परा, हाम्रो संस्कृति र हाम्रो अस्मिता नै हाम्रो पहिचान हो। यसलाई जोगाउन र निरन्तरता दिनु नै हाम्रो कर्तव्य हो।”

कार्यक्रममा उपस्थित अतिथिहरूले तिहार, म्हः पूजा, नेपाल संवत् र छठ पर्वले ल्याउने सद्भाव, आत्मचिन्तन र पुनर्जागरणको सन्देश समाजभर फैलाउने आवश्यकता औंल्याए ।

सांस्कृतिक प्रस्तुति, दीप प्रज्वलन र शुभकामना आदान–प्रदानसँगै सम्पन्न उक्त कार्यक्रमले स्थानीय समुदायमा चाडपर्वको उल्लास मात्र होइन, सामाजिक ऐक्यबद्धता र परम्पराप्रतिको निष्ठा पुनर्स्थापित गर्ने अवसर पनि सिर्जना गरेको सहभागीहरूले बताएका छन् ।

कार्यक्रमको अन्त्यमा वडा अध्यक्ष हिरा लाल टन्डुकारले उपस्थित सबैलाई धन्यवाद ज्ञापन गर्दै आगामी वर्ष पनि सो कार्यक्रमलाई अझ व्यवस्थित र भव्य रूपमा निरन्तरता दिने प्रतिबद्धता व्यक्त गर्नुभयो ।