होस्टल व्यवसायी संघ काठमाडौंमा नयाँ नेतृत्व चयन, हिक्मत बहादुर थापा अध्यक्षमा निर्वाचित

२१ भदौं,काठमाडौँ । होस्टल व्यवसायी संघ काठमाडौं जिल्ला कार्यसमितिको विशेष अधिवेशनबाट नयाँ नेतृत्व चयन भएको छ । मिति २०८२ भदौं २१ गते प्रमुख निर्वाचन आयुक्त तथा  संस्थाकी केन्द्रीय महासचिव सुनिता बाटाजुको अध्यक्षतामा सम्पन्न अधिवेशनले नौ सदस्यीय जिल्ला कार्यसमिति निर्वाचित गरेको हो ।

निर्वाचित पदाधिकारी तथा सदस्यहरूमा अध्यक्ष हिक्मत बहादुर थापा, उपाध्यक्ष  जुनु ढकाल, सचिव ध्रुव प्रसाद कंडेल, सहसचिव डम्बर जोशी, कोषाध्यक्ष कमला भट्टराई पौडेल तथा सदस्यहरूमा रमिता श्रेष्ठ, निरज ढकाल, कमला उप्रेती र टेक बहादुर गुरागाई रहेका छन् ।

 

नव निर्वाचित अध्यक्ष हिक्मत बहादुर थापाले संस्थाको अहित हुने कुनै पनि काम नगर्ने र त्यस्तो प्रयासलाई अन्य कार्यसमितिका सदस्यहरूसमेतबाट रोक्ने दृढ प्रतिबद्धता जनाउनुभयो । उहाँले संस्थामा आउने जस्तोसुकै चुनौतीलाई सामना गर्दै अघि बढ्ने विश्वास दिलाउनुभएको छ । साथै, आफ्नो कार्यकालमा सदस्य संख्या वृद्धि गर्ने र संघलाई अझ सक्षम र प्रभावकारी बनाउने लक्ष्य रहेको बताउनुभयो ।

अधिवेशनलाई सम्बोधन गर्दै प्रमुख निर्वाचन आयुक्त सुनिता बाटाजुले होस्टल व्यवसायीहरूको साझा मञ्चका रूपमा संघलाई सुदृढ बनाउन नव निर्वाचित पदाधिकारीहरू जिम्मेवार भएर अघि बढ्नुपर्नेमा जोड दिनुभयो ।

विशेष अधिवेशनमा उपस्थित प्रतिनिधिहरूले होस्टल व्यवसायीहरूको हकहित र समस्या समाधानका लागि नयाँ नेतृत्वले ठोस कदम चाल्ने अपेक्षा व्यक्त गरेका छन् । संघको आगामी कार्यक्रमलाई प्रभावकारी बनाउन पनि अधिवेशनले विभिन्न सुझावहरू प्रस्तुत गरेको थियो ।