बृद्धभत्तामा गल्दै सरकार, पुरक बजेट ल्याएरै भए पनि भत्ता बढाउने तयारी

मुकुन्द गैरे
बिभिन्न पार्टीका चुनावी घोष्णा पत्रमा बृद्धभत्ता बढाउने कुरा बडो प्राथमिकताका साथ राखियो । त्यही बृद्धभत्ताको नाराले धैरेले चुनाव पनि राम्रै संग जिते । खास गरी तत्कालिन नेकपा एमाले र माओवादी केन्द्रको लागी राम्रै मसला बन्यो । त्यसैले नै होला उनीहरुले देशै भरी बाट भारी मतका साथ दुई तिहाईको हाराहारी सिट जित्न समेत सफल भए । जसको फलस्वरुप यी दुई पार्टी एक भएको अवस्था पनि छ ।

अहिले सरकार बामपन्थी पार्टीको अर्थात नेकपाको रहेको अवस्था छ । चुनावी ताका बृद्धभत्ता २ हजार बाट ५ हजार पुरयाउने भने पनि सरकारमा पुगे पछि यो कुराले खासै प्राथमिकता पाएन । सरकारले बजेट ल्याए संगै बृद्धभत्ता नबढाएको बिषय अहिले देश भर असन्तुष्टीको बिषय बन्न पुगेको छ । गुनासाका पोकाहरुलाई थेग्न नसके पछि सरकार पुरक बजेट ल्याएरै भए पनि बृद्धभत्ता बढाउने तरखर गरेको छ ।

वजेटमा बृद्धभत्ता नबढाए पछि चर्काे जनगुनासो बढेको भन्दै बृद्धभत्ता बढाउनकै लागि पनि पुरक वजेट ल्याउने गरी छलफल अर्थमन्त्रालयमा भएको छ । पुरक वजेटका सन्दर्भमा प्रधानमन्त्री केपी शर्मा ओली र नेकपाका अध्यक्ष प्रचण्डले पनि छलफल गरेका छन् । नेकपा अध्यक्ष प्रचण्डले देशका बिभिन्न ठाउमा पुग्दा वजेटमा बृद्धाभत्ता नबढाएकोमा चौतर्र्फी आलोचना भएको कुरा प्रधानमन्त्री केपी शर्मा ओलीलाई जानकारी गराएका छन् ।

पुरक वजेटबारेको छलफल पुरानै भएको भन्दै प्रचण्डले जनगुनासो सम्बोधन गर्ने विकल्पका रूपमा ल्याउने गरी छलफल भएको बताएका छन् । पुरक वजेट जरुरी ठानिए सरकारले ल्याउन सक्ने अध्यक्ष प्रचण्डको भनाइ छ । साथै अर्थमन्त्रालयको स्रोतका अनुसार पुरक बजेट ल्याएर भए पनि बृद्धभत्ता बढने देखिएको छ । तर कति प्रतिशत बढने भन्नेमा भने अहिले नै भन्न नसकिने अवस्था रहेको अर्थमन्त्रालय स्रोतले बताएको छ ।