३६ ओटा गीत एकै पटक सार्वजनिक गर्दै डा. उपाध्यायले राखे विश्व कीर्तिमान

काठमाडौं । भनिन्छ, मान्छेको सफलता मेहनत,परिश्रम र अनुशासनमा भर पर्छ । मानिस जन्म संगै कुनै एउटा प्रतिभा पनि संगै लिएर आएको हुन्छ । आफनो जीबन कुन बाटोमा लैजाने कुरा उनको लगनशिलतामा भरपर्ने गर्छ ।

कतिपय मानिस जीबनमा कहिलेकाही असफल हुँदा पनि केही गर्न नसकेको भन्दै डिप्रेशन जाने तथा कालान्तरमा आत्महत्याको बाटो समेत रोज्ने गरेका उदाहरण हाम्रो समाजमा प्रशस्तै छन् । तर जीवनमा संर्घष र मेहनत गरे नाम दाम कमाउन सकिन्छ भनेर लाग्नेहरु भने आफ्नो कार्यमा ढिलो चाँडो अवश्य सफल हुन्छन् । जसको उदाहरण हुन् गीतकार डा. डीआर उपाध्याय ।

नेपाली सांगीतिक क्षेत्रमा गीत लेखेरै उपाध्यायले आफ्नो नाम विश्व चिनाउन सफल भए । ६ गीति एल्बमका ३६ ओटा गीत एकै पटक सार्वजनिक गर्दै उपाध्यायले गिनीज बुक अफ वल्र्ड रेकर्डमा आफ्नो नाम दर्ज गराएका छन् । नेपाली गीत संगीतका फरक फरक ६ विधामा ‘वल्ड बुक अफ रेकर्ड’मा आफ्नो नाम दर्ता गराएका गीतकार उपाध्यायले यसै हप्ता मुम्बई पुगेर सम्पूर्ण प्रमाणपत्र ग्रहण समेत लिइसकेका छन् ।

नेपाली गीत संगीतका विभिन्न विधामा योगदान दिएको भन्दै उनलाई विश्वका विभिन्न मुलुकले पनि सम्मान गरेको छ ।गीतकार उपाध्यायलाई एकैपटक ३६ गीत सार्वजनिक गरेर विश्व रेकर्ड कायम भएको प्रमाण पत्र प्रदान गरिएको हो ।

एउटै गीतमा ३ सय भन्दाबढी लोक बाजाहरुको प्रयोग गरेर गीत रेकर्ड गरिएको यो पहिलो पटक हो । सोही कारण उपाध्यायको गीत‘वल्र्ड बुक अफ रेकर्ड’मा दर्ता भयो । यसका अलावा उपाध्यायका आठ फरक गीत आठ फरक बिटमा संगीत गरेर समेत रेकर्ड भएका छन् ।