नायब सुब्बा हरिप्रसादले सुसाइड पत्रमा श्रीमतीलाई लेखे– दराजमा चेक छ, झिकेर चलाउनु

काठमाडौँ २७, साउन । कीर्ते गरेर सरकारी जग्गा व्यक्तिको नाममा दर्ता गरिएको मुद्दा खेपिरहेका मालपोत कार्यालय, कलंकीका पूर्वनायब सुब्बा हरिप्रसाद आचार्यको सुसाइड नोटमा विभिन्न सन्देश लेखेर छाडेको पाइएको छ । उदयपुर प्रहरीका अनुसार स्पाइरल नोट कपीको दुई पृष्ठमा आत्महत्याको कारणसहित विभिन्न सन्देश लेखेर छाडेका छन् ।

आचार्यले श्रीमतीलाई बैंकमा खासै पैसा नभएको पनि बताएपनि राष्ट्रिय वाणिज्य बैंक, एनसीसी र एनआईसीमा रहेको खाता हेर्न भन्दै चेक दराजमा राखेको र त्यसबाट झिकेर गुजरा चलाउन भनेका छन् । सुसाइड नोटमा छोरालाई स्नातक पढाउन नसकेकोमा पछुतो लागेको समेत उल्लेख गर्दै आफ्नो नाममा पुराण नलगाउन समेत भनेका छन् ।

उनले श्रीमतीलाई काठमाडौंमा कान्छो छोरासँग गएर बस्न भनेका छन् । उनले आफन्तसँग घरको भैंसी र खसी बिक्री गर्न सघाउन आग्रह पनि गरेका छन् । असह्य भएर आफूले आत्महत्याको बाटो रोजेको व्यहोरा समेत उनले लेखेका छन् ।

साविक बाडभञ्ज्याङ गाविस–३ को पाताल तथा ठोट्ने खोला र चिसापानी सामुदायिक वन उपभोक्ता समूहको सरकारी जग्गा व्यक्तिको नाममा गराउनमा संलग्न देखिएको भन्दै मुद्दा अख्तियारले चलाएको थियो । उनीसँगै मुद्दा मालपोत अधिकृत शिवप्रसाद रिमाल, मिनाकुमारी थापा, रामकुमार सुयल थापा, दीपेन्द्रविक्रम शाह, बाबुराम शर्मा रेग्मी र योगेन्द्र पोखरेलविरुद्ध चलेको थियो ।

उनीहरुविरुद्ध सरकारी मूल्यांकनअनुसार दुई करोड २१ लाख १० हजार रुपैयाँ पर्ने सरकारी जग्गा हडप्ने उद्देश्यले गैरकानूनी काम गरेको अख्तियारको ठहर गरेको थियो ।

यसअघि त्रिभुवन विश्वविद्यालय सेवा आयोगको अनियमिततामा मुछिएका पूर्वसह–सचिव रामबहादुर पाण्डे र बालुवाटार जग्गा प्रकरणमा मुछिएका पूर्वनासु युक्तप्रसाद श्रेष्ठले आत्महत्या गरिसकेका छन् ।