कांग्रेसका १० युवा नेताहरूले संयुक्त वक्तव्य जारी गर्दै पार्टी भित्रै गरे यस्तो माग

 

काठमाडौँ । नेपाली कांग्रेसका युवा नेताहरूले पार्टी भित्रै नेतृत्वबाट असुरक्षित हुने अवस्थाको अन्त्य गर्न माग गरेका छन् ।

क्रियाशील सदस्यताको विषयलाई लिएर विवाद र दबाबमुलक कार्यक्रमहरु भइरहेकोप्रति लक्षित गर्दै युवा नेताहरुले पार्टी भित्र न्यायका लागि धर्ना दिनु पर्ने र अनशन बस्नु पर्ने अवस्थाको अन्त्य गर्न नेतृत्वको ध्यानाकर्षण गराएका हुन् ।

काँग्रेसका १० युवा नेताहरूले संयुक्त वक्तव्य जारी गर्दै चौधौँ महाधिवेशनको प्रारम्भिक तयारीका क्रममा उठेका विभिन्न प्रश्नहरू र क्रियाशील सदस्यताका विषयमा केन्द्रीय कार्यालयमा भइरहेको धर्नाको सम्बोधन गर्न माग गरेका हुन् ।

नेताहरु डा चन्द्र भण्डारी, धनराज गरुङ, कमला पन्त, रत्ना शेरचन, गगन थापा, बद्री पाण्डे, गुरुराज घिमिरे, सरिता प्रसाईं, रामकृष्ण यादव र किरण यादवले जारी गरेको प्रेस विज्ञप्तिमा क्रियाशील सदस्यता सम्बन्धी विवाद तत्काल समाधान गरेर महाधिवेशनको सुनिश्चितता गर्न आग्रह गरेका छन् ।

‘मुख्य गरी पार्टी महाधिवेशनका प्रारम्भिक मतदाताको रुपमा रहेका क्रियाशील सदस्यहरुको विवादले निर्धारित समयमा महाधिवेशन हुने कुरामा संशय बढाएको छ । हामीसँग समयको सुविधा छैन र उपलब्ध समय समेत साँघुरिदै गएको छ । यस्तो बेलामा क्रियाशील सदस्यको विवादलाई कायम राख्नु र बढाउनु युक्तिसंगत हुँदैन । पार्टी विधानले निर्दिष्ट गरेको प्रक्रिया, मापदण्ड र केन्द्रीय समितिको निर्णय विपरीत गरिने कार्यले कसैको भलो गर्दैन ।’ विज्ञप्तिमा भनिएको छ ।

विभिन्न जिल्लाका नेता तथा कार्यकर्ताहरु क्रियाशील सदस्यता सम्बन्धी विवादका कारण पार्टी केन्द्रीय कार्यालय सानेपामा धर्ना र आमरण अनशनमा बसेका छन् । उनीहरुले विगत साढे तीन वर्षमा ओली नेतृत्वको सरकारको निरंकुश व्यवहारले जनतामा बढाएको निराशाको अन्त्य गर्दै कष्टकर हुँदै गएको दैनिकीमा सुधार गर्न पनि सरकारलाई आग्रह गरेका छन् ।