राज्यमन्त्री सुमनद्वारा राजीनामा, पोखरेल नेतृत्वको सरकार अल्पमतमा

 

लुम्बिनी प्रदेशका भौतिक पूर्वाधार विकास राज्यमन्त्री सुमन शर्मा रायमाझीले पदबाट राजीनामा दिएकी छन । उनले आज राजीनामा दिएकी हुन् । उनले मुख्यमन्त्री शंकर पोखरेललाई बुझाएको राजीनामा पत्रमा भनेकी छन –‘जनता समाजवादी पार्टी नेपाल तपाईको नेतृत्वमा रहेका सरकारलाई समर्थन नरहेकोले मैले तपाईको सरकारमा पार्टीको समर्थन र सहयोग बिना यस प्रदेशको सरकारमा रही निरन्तरता दिन नसक्ने भएकोले नेपालको संविधानको धारा १६९ को २ को क बमोजिम आजको मितिबाट लागू हुने गरी मैले मेरो मन्त्री पदबाट राजीनामा गरेको छु ।’

उनी गत बैशाख ६ गते राज्यमन्त्रीमा नियुक्त भएकी थिइन् । राजीनामापछि उनी जसपामा उपेन्द्र यादव पक्षमा लागेकी छन् ।उनको राजीनामापछि मुख्यमन्त्री शंकर पोखरेल नेतृत्वको सरकार अल्पमतमा परेको छ । ८३ सदस्यीय लुम्बिनी प्रदेश सभामा एमालेका ३८ सदस्य छन् । रायमाझीसहित जसपाका ४ सांसदको समर्थनमा ४२ सांसद जुटाएर मुख्यमन्त्री पोखरेलले बहुमत पु¥याएका थिए । अब उनको समर्थनमा ४१ सांसद मात्र छन् ।