महासंघलाई वर्तमान चुनौतीबाट बाहिर निकाल्दै उद्योगी–व्यवसायीको हितमा काम गर्न सक्षम नेतृत्व आवश्यक छः घिमिरे

काठमाडौं । उद्योग बाणिज्य महासंघ अहिले विषम परिस्थितिबाट गुज्रिरहेको बताउँदै उद्योगी शिब प्रसाद घिमिरेले महासंघको विकास र विस्तारका लागि आफ्नो भूमिका महत्वपूर्ण हुने दाबी गरेका छन्।

सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले वस्तुगत संघतर्फ उपाध्यक्ष पदका लागि आफ्नो उम्मेदवारी महासंघलाई सुदृढ र प्रभावकारी बनाउने लक्ष्यसहित अघि बढाइएको उल्लेख गरेका छन्। महासंघलाई वर्तमान चुनौतीबाट बाहिर निकाल्दै उद्योगी–व्यवसायीको हितमा काम गर्न सक्षम नेतृत्व आवश्यक रहेको उनको भनाइ छ।

घिमिरेले आफू र आफ्नो समूहका १६ जना सदस्यहरूलाई अत्याधिक मतले विजयी गराउन उद्योगी व्यवसायीहरूसँग अनुरोध गरेका छन्। “महासंघको विकास र विस्तारका लागि मेरो भूमिका महत्वपूर्ण रहने विश्वासका साथ मलाई र मेरो समूहलाई अत्याधिक मतले विजयी गराउनुहुन अनुरोध गर्दछु,” उनले फेसबुक पोस्टमा उल्लेख गरेका छन्।

महासंघको नेतृत्व चयनलाई लिएर अहिले व्यवसायीबीच तीव्र प्रतिस्पर्धा देखिएको छ भने उम्मेदवारहरूले आ–आफ्ना योजना र प्रतिबद्धता सार्वजनिक गर्दै मतदातालाई आकर्षित गर्ने प्रयास गरिरहेका छन्।