नेपाली सेफ सोसाइटीले नेपाली परम्परागत खानाको प्रदर्शनी तथा व्यापार मेला आयोजना गर्ने

१९ चैत, ललितपुर । नेपाली खानाको मौलिकताको परिचय , प्रवर्द्धन र व्यवसायीक सम्भावनाहरुको विस्तार गर्न अन्तर्राष्ट्रिय स्तरको प्रदर्शनीको आयोजना गरिने भएको छ। नेपाली सेफ सोसाइटीको आयोजनामा आगामी २०८२, वैशाख ६ गते काठमाडौंको भृकुटीमण्डपमा नेपाली परम्परागत खानाको ऐतिहासिक प्रदर्शनी तथा व्यापार मेलाको आयोजना गरिने मंगलबार आयोजित पत्रकार सम्मेलनमा जानकारी दिइयो ।

कार्यक्रममा नेपाली सेफ सोसाइटीका अध्यक्ष एल.बी. कौशलले नेपाली खानालाई राष्ट्रिय , अन्तर्राष्ट्रिय पहिचान दिन यो प्रदर्शनीको आयोजना गरिन लागेको जानकारी दिए। ‘ यो प्रदर्शनीमा युरोप , दक्षिण अमेरिका लगायतका ३६ वटा राष्ट्रबाट नेपाली सेफहरुको उल्लेखनीय सहभागिता हुनेछ । उद्योगी-व्यवसायी तथा खानाका परिकार र कलिनरी आर्टस् सम्बन्धि रुचि हुने सबैलाई सहभागी हुन आग्रह गर्दछौं ‘, उनले भने।

प्रदर्शनीकै सिलसिलामा नेपाली सेफ सोसाइटी नेपाल र अन्तर्राष्ट्रिय नेपाली सेफ सोसाइटीको संयुक्त आयोजनामा आगामी वैशाख ४ गते ललितपुरको लगनखेलस्थित एकेडेमी अफ कलिनरी आर्टस् कलेजमा अन्तर-कलेज कुकिङ प्रतियोगिता समेत हुने कौशलले जानकारी दिए।

यस प्रतियोगितामा कलेज तहका विद्यार्थी सेफहरुले आफ्नो पाक-कला सीप र प्रतिभा प्रस्तुत गरि नेपाली परम्परागत खानालाई नवप्रवर्तन मार्फत विश्वव्यापी पहिचान बनाउने अवसर प्रदान गर्ने उनले बताए । प्रतियोगितामा विजेता टोलिहरुलाई नगद पुरस्कार स्वरुप प्रथमलाई एक लाख, द्वितीयलाई पचहत्तर हजार र तृतीयलाई पचास हजार प्रदान गरिने उनले जानकारी दिए।

प्रदर्शनीस्थल भृकुटीमण्डपमा  हुने यस अन्तर्राष्ट्रिय स्तरको नेपाली मौलिक र रैथाने खानाको प्रदर्शनीको लागि इच्छुक व्यक्ति र संस्थाले स्टल बुकिङ गर्न नेपाली सेफ सोसाइटीमा सम्पर्क गर्न सक्ने आयोजकले जानकारी दिएका छन्  ।

सोही अवसरमा अन्तर्राष्ट्रिय नेपाली सेफ सोसाइटीको प्रथम अधिवेशन पनि सम्पन्न गरिने भएको छ।